(චමිල් රූපසිංහ)

පේරාදෙණිය සරසවි උයන විද්‍යාලයේ නවක වදයට විරුද්ධ වූ 12 වසරේ ඉගෙනුම ලබන සිසුවෙකුට එම පාසලේම 13 වසරේ ඉගෙනුම ලබන සිසුන් පිරිසක් පහරදීම හේතුවෙන් එම සිසුවා අද (19) පේරාදෙණිය ශික්ෂණ රෝහලට ඇතුළත් කර ඇති බව පොලිසිය පවසයි.

පහර දීමෙන් රෝහල් ගත කර ඇත්තේ සරසවි උයන විද්‍යාලයේ උසස් පෙළ සඳහා 12 වසරට තේරී පත්වූ පේරාදෙණිය දොඩම්පිලපිටිය ප්‍රදේශයේ පදිංචි සිසුවෙකි.

පසුගිය 17 වන දින විද්‍යාලයේ වාණිජ අංශය සඳහා නවක සිසුන් පිළිගැනීමේ උත්සවයක් 13 වසරේ සිසුන් විසින් සංවිධානය කර තිබූ බවත් එදින එම උත්සවය අවසානයේදී 13 වසරේ ඉගෙනුම ලබන සිසුන් විසින් පහරකෑමට ලක් වූ සිසුවා නවක වදයට ලක් කිරීමේදී එයට විරුද්ධ වීම නිසා ඇති වූ ආරවුල පාසලේ ගුරුවරුන් විසින් සාමදානයට පත් කර ඇත.

අද (19) උදෑසන මෙම සිසුවා පාසලට පැමිණිමේදී නැවත 13 වසරේ සිසුන් විසින් පහර දීම හේතුවෙන් පේරාදෙණිය රෝහලට ඇතුළත් කිරීමෙන් පසු මහනුවර රෝහලට මාරු කර යවා ඇති බව පොලිසිය පැවසීය.

පේරාදෙණිය පොලිසිය මගින් මෙම සිසුවාට පහරදුන් සිසුන් අත් අඩංගුවට ගැනීමෙන් පසු මහනුවර මහේස්ත්‍රාත් අධිකරණයට අද (19) ඉදිරිපත් කිරීමෙන් අනතුරුව මහනුවර අධිකරණයේ මහේස්ත්‍රාත් දුමින්ද පි මුදුන්කොටුව මහතා විසින් මෙම සිසුන්ට තරයේ අවවාද කර ලක්ෂ දෙකක ශරීර ඇප මත නිදහස් කිරීමට නියෝග කළේය.