(අප්සරා යෝසිත් විජේසූරිය)
 
රත්නපුර එගොඩ මල්වල ප‍්‍රදේශයේ කාන්තාවන් දෙදෙනකු ඝාතනයකිරීම සම්බන්ධව අත්අඩංගුවට ගත් සැකකරුවකු ජූනි මස 05 දක්වා බන්ධනාගාර ගත කිරීමට රත්නපුර වැඩබලන මහේස්ත‍්‍රාත් වසන්ත වීරසිංහ මහතා නියෝග කළේය.
 
මෙසේ බන්ධනාගාර ගත කරන ලද්දේ තෙල්දෙණිය කිතුල්ගල මහනුවර ලිපිනයේ පදිංචි මහින්ද සමරක්කොඩි නැමැති 43 හැවිරිදි අයෙකි.
 
ඉකුත් 15 දින රාත‍්‍රියේදී එගොඩ මල්වල ප‍්‍රදේශයේ නිවසක පදිංචි සිටි ලලනී  පුෂ්පලතා (43) නැමති විවාහක එක්දරු මවක සහ එම කාන්තාවගේ මව වන කේ.නන්දාවතී (75) නැමැත්තිය තියුණු ආයුධවලින් කපා කොටා මරාදැමීම සම්බන්ධව මෙම සැකකරු 26 වැනිදා අත්අඩංගුවට ගෙන අධිකරණයට ඉදිරිපත් කළ බව පොලිසිය පවසයි. 
 
සැකකරු මියගිය ලලනී පුෂ්පලතා නැමැති කාන්තාවගේ  විවාහක සැමියා බවද හොරණ ප‍්‍රදේශයේ තැඹිලි විකිණීමේ යෙදී සිටි අයෙකු බවද තොරුතුරු අනාවරණය ඇත. 
 
ඝාතනයට පත් කාන්තාවන් සිටි නිවසේ තිබූ අධිකරණයකට දඩමුදල් ගෙවූ රිසිට්පතක සඳහන් කරුණු අනුව සැකකරු සොයා ගත් බව පොලිසිය සඳහන් කරයි.
 
බණ්ඩාරගම පොලිසිය සැකකරු අත්අඩංගුවට ගෙන රත්නපුර පොලිසිය වෙත භාරදී තිබුණි.
 
මෙම නඩුව ජූනි මස 15 දින අධිකරණයේදී යළි කැඳවීමට නියමිතය.