(නිමල කොඩිතුවක්කු)

ජාතික රෝහලේ ප‍්‍රධාන විකිරණ අංශයේ තිබූ ලේ නහර වල ඇතිවන විවිධ රෝග තත්ත්වයන්  සම්බන්ධයෙන් පරීක්ෂණ හා ප‍්‍රතිකාර ලබාදීමට යොදාගන්නා ඩී. එස්. ඒ යන්ත‍්‍රය  2016 වසරේ සිට අක‍්‍රීයව පවතින බව සමස්ත ලංකා හෙද සපවසයි.

මෙම තත්ත්වය හමුවේ ජාතික රෝහල තුළ ලේ නහර ආශ‍්‍රිත විවිධ ආබාධ වලින් පෙළෙන දහස් සංඛ්‍යාත රෝගීන් පිරිසකට ප‍්‍රතිකාර ලබාදීමේ හැකියාව සීමා වී ඇති බව එම සංගමයේ වැඩබලන සභාපති එච්.එම්.එස්.බී. මැදිවත්ත මහතා සදහන් කරයි.

ශල්‍යකර්ම කිරීමකින් තොරව රෝගියාගේ රෝගී තත්ත්වයට ප‍්‍රතිකාර කිරීමට හැකිවීම මෙම යන්ත‍්‍රයේ විශේෂත්වයයි.

ජාතික රෝහල සතුව වෙනත් ඒකක 02 ක ඞී. එස්. ඒ යන්ත‍්‍ර 02 ක් තිබුණද, ඒවා එම ඒකකවල ප‍්‍රතිකාර ලබන රෝගීන්ගේ කටයුතු සඳහා ප‍්‍රධාන වශයෙන් යොදා ගැනේ.

එසේම ජාතික රෝහලේ මෙම ප‍්‍රතිකාර සඳහා මාස 02 - 03 ක පොරොත්තු ලේඛණයක්ද ඇති බවද මැදිවත්ත මහතා සදහන් කරයි.