(ක්‍රිෂාන් ජීවක ජයරුක් සහ සුජීව සමරක්කොඩි)
 
පසුගිය දින කිහිපයේ මාතර දිස්ත්‍රික්කයට බලපෑ තද සුළං නිසා  නිවාස 80 කට පමණ හානි සිදු වී ඇතැයි මාතර දිස්ත්‍රික් ආපදා කළමනාකරණ මධ්‍යස්ථානය පවසයි.
 
එහි සහකාර අධ්‍යක්ෂක ලුතිනන් කර්නල් ප්‍රියංකර පියසේන මහතා පැවසූවේ ඉකුත් සිකුරාදා (19) නිවාස 72 කට හානි සිදු වී ඇති බවට තොරතුරු වාර්තා වී බවයි.
 
ඉන් පසුව සිදුව ඇති හානිවීම් පිළිබඳව අද (21) දින ගණනය කරන බවද ඒ මහතා කීය.  මාතර ප්‍රාදේශීය ලේකම් කොට්ඨාසයේ පමණක් නිවාස 20 කට පමණ හානි සිදු වී තිබෙන බව මාතර ප්‍රාදේශීය මහ ලේකම් දර්ශන වික්‍රමආරච්චි මහතා පැවසීය.

දෙවිනුවර ප්‍රාදේශීය ලේකම් කොට්ඨාසයේ නිවාස 7 කට පමණ හානි සිදු වී ඇති බව එහි ප්‍රාදේශීය ලේකම් රංජිත් යාපා මහතා කීය.
 
මේ අතර කද්දුව නාරංගොඩ ප්‍රදේශයේ දෙමහල් නිවසක් මතට ඇකේෂියා ගසක් කඩා වැටීම නිසා එම නිවසට දැඩි අලාභ හානි සිදු වී ඇත.
 
නිවස තුළ  සිටි 72 හැවිරිදි පුද්ගලයෙකු ද සුළු තුවාල ලබා තිබේ. මාතර යටියන ප්‍රධාන මාර්ගය මතට පොල් ගසක් කඩා වැටීම නිසා පැය කිහිපයක් ගමනගමන කටයුතු අඩාල වී තිබුණි.
 
උඩ අපරැක්ක ආගරවල ප්‍රදේශයේ ද විශාල ගසක් කඩා වැටී විදුලි රැහැන් පද්ධතියට හානි සිදු වී තිබේ. කෙසේ නමුදු හක්මන විදුලි බල මණ්ඩලයේ සේවකයින් පෙරේදා (20) සවස් වනවිට විදුලි රැහැන් පද්ධතිය යළි යථා තත්වයට පත් කර තිබුණේය. මේ ආකාරයට මාතර දිස්ත්‍රික්කය පුරා ස්ථාන රැසක විශාල ගස් සහ විශාල නාම පුවරු සුළගට කඩා වැටී ඇත. දින හතරක පමණ කාලයක සිට විටින් විට ඇති වන තද සුළං තත්වය අද (21) වන තෙක්ම පැවතිණි.වර්ෂාවට විටින් විට ඇද හැලෙමින් තිබේ.