(ඔගස්ටින් ප්‍රනාන්දු)
        
මේ දිනවල මහ මුහුද පිහිටි ප්‍රදේශයන්ට බලපා ඇති දැඩි සුළං හේතුකොට ගෙන හලාවත වැල්ල ධීවර ගම්මානයේ ධීවර පවුල් වලට ආපදා තත්ත්වයට මුහුණ දීමට සිදුව ඇති බව පුත්තලම දිසාපති කාර්යාලය කියයි.

හලාවත වැල්ල කල්ලුකුලිය කුරුසපාඩුව යන ප්‍රදේශවල නිවාස 80 කට අධික ප්‍රමාණයක් වෙරළාසන්නයේ ඉදි කර ධීවරයින් වාසය කරනු ලබන අතර එයින් නිවාස 52කට වෙරළ ඛාදනය නිසා දැඩිහානි සිදුව ඇත. එම නිවාසවල වාසය කරන ධීවර පවුල් එම නිවාස වලින් ඉවත් කර වැල්ල සාන්ත සෙබස්තියන් දෙව් දෙව්මැදුරේ තාවකාලිකව රැඳවීමට උපදෙස් දී ඇති බව පුත්තලම දිස්ත්‍රික් ආපදා කළමනාකරණ මධ්‍යස්ථානය කියයි.

වෙරළ ඛාදනය සහ විටින් විට ගොඩබිම කරා එන ප්‍රචණ්ඩ රළ මෙම ප්‍රදේශයේ ඇති සමුද්‍රාසන්න මාර්ගය හරහා ගොඩ බිමට පැමිණ අනෙක් පස ඇති කලපුවට ගලා යන බව දැක ගත හැකි විය. මේ නිසා මේ වනවිට එම සමුද්‍රාසන්න මාර්ගය ද දරුණු ලෙසින් වෙරළ ඛාදනයට හසුවීමෙන් තැනින් තැන හානියට පත්ව ගමනා ගමන කටයුතු නතර වී ඇති බවත් කියයි.

වෙරළේ රඳවා තිබු එක් දින යාත්‍රා මුහුදු රළ සමග පැමිණ එම මාර්ගයේ රැඳී ඇතිබවත් දැක ගත හැකිය.

බලධාරීන් අවශ්‍ය පියවර නොගැනීම නිසා තමන් හිස් පෝර උරවලට වැලි පුරවා හානි අවම කිරීමට පියවර ගනිමින් සිටි ධීවරයින් යුහුසුළුව කටයුතු කරමින් සිටිනු ද දැකගත හැකි විය.

ප්‍රදේශය පුරා සිදුව  ඇති හානි දැක ගැනීම පිණිස පුත්තලම දිසා ලේකම් එන්.එච්.කේ. චිත්‍රානන්ද හලාවත ප්‍රාදේශීය ලේකම් ඩි.එමි.ඒ.කේ දිසානායක යන මහත්වරු ඇතුළු පිරිසක් ඊයේ (19) පස්වරුවේ ප්‍රදේශය පුරා සංචාරය කළහ.

හැකි ඉක්මනින් මෙම වෙරළ තීරයට ගල්වැටි යෙදිමට පියවර ගන්නා බව ඔවුහු ධීවරයන්ට පොරොන්දු වුහ.