(කාංචන කුමාර ආරියදාස)
 
නකල්ස් කදු පද්ධතිය සහ ලකේගල මුදුනින් ගලා හැලෙන හීන් ගඟ ආරක්ෂා කිරීම සඳහා විල්ගමුව කොට්ඨාසයේ දේශපාලන පක්ෂ හතරක මහජන නියෝජිතයන් ඒකාබද්ධවී " හීන් ගඟ ආශිත ජන අයිතිය සුරැකීමේ සටන් පෙරමුණ "නමින් සංවිධානයක් පිහිටුවාගෙන තිබේ.
 විල්ගමුව ප්‍රාදේශීය සභාවේ සභාපති ඒ.ජි . තෙන්නකෝන් මහතාගේ ප්‍රධානත්වයෙන් පක්ෂ විපක්ෂ මන්ත්‍රීවරුන් විශේෂ මහා සභාවක් කැඳවා මෙම සංවිධානය පිහිටුවාගෙන තිබේ.
 ශ්‍රී ලංකා නිදහස් පක්ෂය නියෝජනය කරමින් ‍ප්‍රාදේශීය  සභා මන්ත්‍රී වසන්ත ඒකනායක  ශ්‍රී  ලංකා පොදු ජන පෙරමුණ නියෝජනය කිරීම සඳහා උප සභාපති ඉන්දික සමන් කුමාර ,එක්සත් ජාතික පක්ෂය නියෝජනය කිරීම සඳහා ප්‍රාදේශීය   මහා මන්ත්‍රී ජයන්ත ඒකනායක, ජනතා විමුක්ති පෙරමුණ නියෝජනය කිරීම සඳහා  ප්‍රාදේශීය සභා මන්ත්‍රී නිශාන්ත ප්‍රදීප් කාන්තාවන් නියෝජනය කිරීම සඳහා ‍  සභාවේ කාන්තා නියෝජිත මන්ත්‍රීවරියන් ඇතුළු පිරිසකගෙන් යුක්තව මෙම සංවිධානය ඇති කළ බව උප සභාපති ඉන්දික සමන් කුමාර මහතා පැවසීය.

 ලකේගල සහ නකල්ස් කඳු පත්ති අතරින් ගලා හැලෙන හීන් ගඟ විල්ගමුව කලාපයේ  පානීය ජලය මෙන්ම ගොවිතැන් සඳහා ඇති එකම ජල මූලාශ්‍රය   බවත් මේ වන විට මෙහි ජලය කඳුමුදුනින් හරස්කොට කළු ගඟට හැරවීම සදහා සක්‍යතා වාර්තාවක් සැකසීම  සිදුකරන බවත් පෞද්ගලික ආයතනයකට මෙය භාර දී මේ වන විටත් විශාල පරිසර හානියක් රක්ෂිතයේ තුළ සිදුවෙන බව ඔවුහු චෝදනා කරති.
මෙම ක්‍රියාදාමය කවුරුන් විසින් සිදු කරන්නේ ද යන්න කිසිදු තොරතුරක් දැන ගැනීමට නොමැති බවත් ඔවුහු කියති.අඩුම තරමේ විශාල පිරිසක් පැමිණ යන්ත්‍ර සූත්‍ර යොදාගෙන මහ වනාන්තරයේ පාරවල් හෙළි පෙහෙළි කරමින් තිබියදීත් කාර්යාලයක් හෝ පවත්වාගෙන නොයෑම නිසා සැක සංකා මතු වන බව එම සංවිධානය කියයි.
 ශ්‍රී ලංකා මහවැලි අධිකාරියෙන් සහ වගකිවයුතු දේශපාලන බලධාරීන්ගෙන් රජයේ නිලධාරීන්ගෙන් මේ පිළිබඳව විමසීමේදී ඔවුන් ද කිසිදු තොරතුරක් ලබා නොදෙන බවත්  සක්‍යතා  වාර්තාවක් සැකසීම සඳහා අවශ්‍ය නීතිමය ලියකියවිලි පවා කොළඹින් රැගෙනවිත් තිබෙන බවට තොරතුරු අනාවරණය වී ඇතැයි ඔවුන් කියති .
 ලකේ ගල කඳු මුදුනේ  පිහිටි රාවණා සහ සීතා දේවි සිටි බව අතීතයේ සිට ජනප්‍රවාදයේ සඳහන්වන යකා බැඳි ගල මේ දිනවල විදීම  සිදුකරන බවත් මෙය ඉතා ඓතිහාසික වටිනාකමකින් යුත් විල්ගමුව ලග්ගල අනන්‍යතාවය බව ද මෙම සංවිධානය  කියයි .

 
 ඒ අනුව මෙහි කිසිදු තොරතුරක් ලබා නොදී වටිනා ජල උල්පතක් වන හීන් ගඟ කළු ගඟ ජලාශය ට හැරවීමට විරුද්ධව   ප්‍රාදේශීය වශයෙන් පමණක් නොව ජාතික වශයෙන් ද සටන් කිරීම සඳහා සියලු දේශපාලන පක්ෂ එක්ව  ලග්ගල විල්ගමුව ආරක්ෂා කිරීම ලකේ ගල නකල්ස් කඳුවැටිය ආරක්ෂා කිරීම  ජල මූලාශ්‍ර ආරක්ෂා කිරීම පරිසරය ආරක්ෂා කිරීම  හින්  ගඟ ආශ්‍රිත ජන අයිතිය සුරැකීමේ සටන් පෙරමුණේ එකම වගකීම බව ප්‍රාදේශීය සභාවේ උප සභාපති ඉන්දික සමන් කුමාර මහතා වැඩිදුරටත් සඳහන් කළේය.