(රොමේෂ් ධනුෂ්ක සිල්වා)

ලංකා විදුලිබල මණ්ඩලයේ පාරිභෝගික සේවා තවදුරටත් කාර්යක්ෂම කිරීමේ අරමුණින් ජංගම දුරකථන සඳහා භාවිත කරන ඇප් (Mobile App) හඳුන්වාදීමේ උත්සවයක් කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේදී අද(17) පැවැත්විණි. 
 
මෙය විදුලිබල , බලශක්ති හා ව්‍යාපාර සංවර්ධන අමාත්‍ය රවී කරුණානායක මහතාගේ ප්‍රධානත්වයෙන් පැවැත්විණි.
 
‘CEB Care’ නමැති මෙම  ජංගම දුරකථන වැඩසටහන මගින් බිල්පත් ගෙවීම්, පසුගිය බිල්පත් විස්තර ලබාගැනීම, හිඟ මුදල් ගෙවීම්, විදුලි බිඳවැටීම්, පැමිණිලි කිරීම් ඇතුළු කරුණු ගණනාවක් පිළිබඳ තොරතුරු ලබාගැනීමට පාරිභෝගිකයන්ට හැකිවේ. 
 
මෙම ජංගම දුරකථන වැඩසටහන් නිර්මාණ කණ්ඩායමේ ප්‍රධානී විදුලි ඉංජිනේරු ජගත් සමරවික්‍රම මහතා මෙහිදී නිල වශයෙන් CEB Care  ජංගම දුරකථන ඇප් හඳුන්වාදුන්නේය.
        
අමාත්‍යංශ ලේකම් ආචාර්ය සුරේන් බටගොඩ, ලංකා විදුලිබල මණ්ඩලයේ සභාපති රඛිත ජයවර්ධන, ලංකා විදුලිබල මණ්ඩලයේ අතිරේක සාමාන්‍යාධිකාරී ඉංජිනේරු කුමුදිනි හේරත් යන මහත්ම මහත්මීහුද මෙම අවස්ථාවට එක්වූහ.