(ක්‍රිෂාන් ජීවක ජයරුක්)

මුදල් අමාත්‍ය මංගල සමරවීර මහතා පසුගියදා සිදු කළ ආන්දෝලනාත්මක ප්‍රකාශවලට විරෝධය පල කරමින් මාතර මහ නගර සභාවේ ශ්‍රී ලංකා පොදුජන පෙරමුණේ මන්ත්‍රීවරු අත්වල කලු පටි පැළද විරෝධතා පා ගමනකින් අද (11) මාසික සභා රැස්වීමට සහභාගී වූහ.

ඔවුහු මුදල් අමාත්‍යවරයාට එරෙහි සටන් පාඨ කියමින් මාතර මහ නගර සභාවේ ප්‍රධාන දොරටුවෙන් ඇතුළු වී විරෝධතා බැනරයක් ප්‍රදර්ශනය කරමින් රැස්වීම් ශාලාවට ඇතුළු වූහ.

මෙහිදී අදහස් දැක්වු නාගරික මන්ත්‍රී මලිදු ගජධීර මහතා මෙසේ කීය.

“ශ්‍රී ලංකාව බෞද්ධ රටක් නොවන බව කියා ජාතිවාදය වපුරන ලද මංගල සමරවීර ජාතීන් අතර සුහදතාවය පෙන්වන්න කියා විරෝධතා පවත්වනවා. මේක මහ විහිලුවක්. ඒ වගේම කාදිනල්තුමාට අපහාස කරනවා. ඔහුගේ මේ ජාතිවාදී ප්‍රකාශ තවම නතර කර නැහැ. සාමාන්‍ය මිනිසෙකු එවැනි ප්‍රකාශයක් කළා නම් මේ වෙනකොට හිරේ දාලා. ඒත් මංගලට මේ රටේ නීතිය ක්‍රියාත්මක වන්නේ නැහැ. අපි ජනාධිපතිවරයාගෙන් ඉල්ලා සිටිනවා. මේ ඇමැතිවරයාගේ වාග් ප්‍රහාර නතර කරලා ඔහුට විරුද්ධව නීතිය ක්‍රියාත්මක කරන්න කියලා.”

මාතර මහ නගර සභාවේ නියෝජ්‍ය නගරාධිපති චතුර කරුණාරත්න මහතා ඇතුළු මන්ත්‍රීවරු පිරිසක් මෙම අවස්ථාවට සහභාගී වූහ.