(බිමල් ශ්‍යාමන් ජයසිංහ)

මොනරාගල දිස්ත්‍රික් පාර්ලිමේන්තු මන්ත්‍රී සුමේධා ජී.ජයසේන මහත්මියට අයත් පවුම් තුනක් පමණ බර රන් වළල්ලක් කෝට්ටේ මාදිවෙල - ග්‍රාමෝදය මාවතේ පිහිටි දෙමහල් නිවසේ තිබී සොරා ගෙන ගොස් ඇතැයි මිරිහාන පොලිසිය කියයි.

මන්ත්‍රීවරිය ඉකුත් මස 11 වැනි දින මෙම නිවසට පදිංචියට පැමිණ ඇතැයි පොලිසිය කියයි.

එම නිවසේ ඇය සමඟ රෝගී ලොකු පුතා , මෙහෙකාරිය මෙන්ම ඇයගේ අරක්ෂාව සඳහා පොලිස් කොස්තාපල්වරු තිදෙනෙකු සිට ඇති බව පොලිසිය කියයි.

ඉකුත් 6 වැනිදින මන්ත්‍රීවරිය ආරක්ෂකයින් තිදෙනා සමඟ පාර්ලිමේන්තුවට ගොස් නිවසට පැමිණ පහත මහලේ කාමරයේ කණ්ණාඩි මේසයේ ලාච්චුවට රන් වළල්ල දැමූ බවට ඇය කරන ලද පැමිණිල්ලේ සඳහන් වේ.

එදිනම සවස 4.30 පමණ රෝගියෙකු බැලීමට ආරක්ෂයන් සමඟ ශ්‍රී ජයවර්ධනපුර රෝහලට ගිය බවද පැමිණිල්ලේ සඳහන් වේ.

එම අවස්ථවේ නිවසට පැමිණ තිබූ නාඳුනන පුද්ගලයෙකු මන්ත්‍රීවරිය හදුනන බවත් අම්මා අසනීපව සිටින බැවින් මන්ත්‍රීවරියගෙන් රුපියල් 5000 ක මුදලක් ඉල්ලා ගැනීමට පැමිණි බව මන්ත්‍රීවරියගේ ලොකු පුතාට පවසා ඇතැයි පොලිසිය කියයි.

එම පුද්ගලයා නිවසේ පහත මහලේ සිටියදී මන්ත්‍රීවරියගේ පුතා උඩුමහලට ගොස් රුපියල් 2000 ක් එම පුද්ගලයාට ලබා දී ඇතැයි පොලිසිය කියයි.

පසුදින පාර්ලිමේන්තු යෑමට රන් වළල්ල පැලදීම සඳහා කණ්ණාඩි  මේසයේ ලාච්චුව විවෘත කිරීමේදී කැරට් 24 වටිනා රන් වළල්ල එහි නොමැති බවට දැක ඇතැයි පොලිසිය පැවැසීය.

සිද්ධිය පිළිබඳ මිරිහාන පොලිසිය පරීක්ෂණ පවත්වයි.