(බිමල් ශ්‍යාමන් ජයසිංහ)
 
බණ්ඩාරගම කොතලාවල පදික මාරුව මතින් ගමන් කරමින් සිටි අඹුසැමි යුවළගෙන් කාන්තාව මෝටර් රථයේ හප්පා බරපතල තුවාල සිදුකර රෝහලට රැගෙන යන මුවාවෙන් රැගෙන ගොස් බස් රථයකින් වැටුණු බව පවසා බණ්ඩාරගම නගරයේ ත්‍රී රෝද රථ රියැදුරෙකුට බාර දී පලාගිය පුද්ගලයකු දින 11කට පසු අත්අඩංගුවට ගත් බව බණ්ඩාරගම පොලිසිය පවසයි.
 
අනතුරින් තුවාල ලැබුයේ කොතලාවල පදිංචි 65 හැවිරිදි කාන්තාවකි. එම අනතුරින් පසු එම කාන්තාව දින තුනක කාලයක් සිහිසුන්ව සිට ඇති බව පොලිසිය පවසයි.
 
ඉකුත් 9 වැනි දින බරපතල තුවාල ලද කාන්තාව සැමියා සමඟ බණ්ඩාරගම ගැලණිගම ප්‍රදේශයට අත්‍යවශ්‍ය කරුණක් සඳහා ගොස් නැවත පැමිණ නිවසට යාම සඳහා කොතලාවල හන්දියේ පදිකමාරුව මතින් ගමන්කරමින් සිටියදී හොරණ දෙස සිට බණ්ඩාරගම දෙසට ධාවනය වෙමින් තිබූ මෝටර් රථයේ ගැටී බරපතල තුවාල ලබා ඇතැයි පොලිසිය කියයි.
 
එම අවස්ථාවේදී සැකකාර රියැදුරු තුවාල ලද කාන්තාව හා ඇයගේ සැමියා රෝහලට රැගෙන යන මුවාවෙන් එම ස්ථානයෙන් රැගෙන ගොස් ළගම පිහිටි බණ්ඩාරගම රෝහලට රැගෙන නොගොස් බණ්ඩාරගම කලුතර මාර්ගයේ ත්‍රී රෝද රථ ගාල වෙත පැමිණ තිබූ බව පොලිසිය පවසයි.
 
එහිදී ත්‍රීරෝද රථ රියැදුරා අමතා ඇති සැකකරු මෙම කාන්තාව බස් රථයකින් බසිද්දී වැටුණු බවත් තමන් හදිසි අවශ්‍යතාවයකට පිටත්ව යාමට ඇති හෙයින් මෙම කාන්තාව රෝහලට රැගෙන යන ලෙස පවසා ඇතැයි පොලිසිය කියයි.