(දිනේෂ් උපේන්ද්‍ර)                                                                                              
 
පාස්කු ප්‍රහාරය පිළිබඳව සෙවීමට කොමිසමක් පත් කළා සේ පාස්කු ප්‍රෝඩාව ගැන සේවීමටත් වෙනම කොමිසමක් පත්කළයුතුයැයි විපක්‍ෂ නායක සජිත් ප්‍රේමදාස මහතා අද(04) පැවසීය.
         
කුලියාපිටිය ඇස්වැද්දුම ශ්‍රී ශාසනාලංකාර මහා විහාරස්ථානයේ ආගමික වතාවත් වල නිරතවීමෙන් අනතුරුව ඒ මහතා මෙසේ පැවසීය.
 
සෙනසුරාදා ඉරිදා යන දෙදින තුළ සමගි ජනබලය වටා ඒකරාශී වී ඉකුත් මැතිවරණයේදී උපකාර කළ සියලු දෙනා සමග පිළිසඳරෙහි යෙදීම සඳහා යන අතරවාරයේ ඒ මහතා කුලියාපිටිය ශාසනාලංකාර මහා විහාරයට පැමිණ පල්ලේකාගම රතනභාරතී හිමිපාණන්වහන්සේ බැහැදැක ආශිර්වාද ලබාගත්තේය. මාධ්‍යවේදීන් නැගූ ප්‍රශ්නවලට එහිදී පිළිතුරු දුන් විපක්‍ෂ නායකවරයා මෙසේද පැවසීය.
         
“විවිධ මාතෘකා යටතේ සොයාබැලීම් කරන්න විශේෂ කොමිසම් පත්කරලා තියනවා. මේ පාස්කු ප්‍රහාරය පිළිබඳ බොරුකියපු ප්‍රෝඩා කරපු අය ගැන හොයා බලන්න නව කොමිසමක් පත්කළයුතුව තිබෙනවා. ඒ මිය ගිය අහිංසක ජනතාවගේ මළ කඳන් උඩින් තමයි දේශපාලනය කරන්න මේ මහා ප්‍රෝඩාව කළේ. රිෂාඩ් බදියුදීන් මහතා ඇතුලුව ඒ මහතාගේ පවුලේ පිරිස, මැතිවරණයට පෙර ත්‍රස්තවාදීන්ට උදවුකළ අය. නමුත් අද වෙනකොට තත්වය වෙනස් වෙලා. ඒ කාලෙ සතොසෙන් හොරකම් කළා කියලත් කිව්වානෙ. අද අපරාධ පරීක්‍ෂණ දෙපාර්තමේන්තුවෙන්ම කියනවා සාක්‍ෂි නැහැ කියලා.
         
කාර්යාලයක් විවෘත කරනකොට නම් එතුමා ආණ්ඩුවෙ උත්සවයක් නියෝජනය කළා කිව්වට මේ විවෘත කරන හැම එකක්ම අපේ කාලයේ හදපුවා. ඒ නිසා බදියුදීන් මහත්තයට අරාධනාවක් ලැබෙන්න ඇති. ඒත් මම හැමදාම කියන්නෙ අපේ සියලුදෙනා හොඳ දෙමාපියන්ගෙ දරුවො. ඒ අය පක්‍ෂයට පිටින් ගිහින් 20 සම්මත කරන්න උදව් දෙන්නෙ නැහැ.අපි හොඳ ස්ථාවරයක සිටින ශක්තිමත් විනයානුකූල විපක්‍ෂයක් විදිහට මෙතන හැම පක්‍ෂයකම කකුල් තියාගෙන ඉන්න පිරිසක් නැහැ. ඒ සියලුදෙනා කකුල් තියාගෙන ඉන්නෙ රටේ ජනතාවගෙ ජාතික ආරක්‍ෂාව පැත්තෙ.
          
දැන් හැමෝම කථාවෙන්නෙ 20 ගැනයි. ඊට තුනෙන් දෙක හොයන එක ගැනයි. ඇත්තටම තුනෙන් දෙකට ආසන්න ජනවරමක් මේ ආණ්ඩුවට ලැබිලා තියනවව වුනත් ඒක ලැබුණෙ අර කියලු පාස්කු ප්‍රෝඩාව මත. ඒ නිසා ඒක ජනතාවට බොරු කියලා ගත්ත ව්‍යාජ වරමක්. කහ ප්‍රශ්නයට විසඳුම් හොයන්න පොල් මිල පාලනය කරන්න තුනෙන් දෙක අවශ්‍ය නැහැ. ජනතාව ගැන සිතන්නට අවශ්‍යයි. කොහොම වුණත් අපි ජනවරමින් ජන ශක්තියෙන් මේ සදාචාරසම්පන්න නොවන 20 පරදවනවාමයි” යැයිද විපක්ෂ නායක සජිත් ප්‍රේමදාස මහතා පැවසීය.
         
එහිදී සුජීව සේනසිංහ මහතා ස්වාධීනව සිටීමට ගෙන ඇති තීරණය පිළිබඳව ද මාධ්‍යවේදීන් නැගූ ප්‍රශනයට පිළිතුරු දෙමින් ප්‍රේමදාස මහතා කියා සිටියේ මැතිවරණ පරාජය සමගින් ඕනෑම අයෙකුට ආවේගශීලී සිතුවිලි පැමිණුනත්, සියල්ල කාලයාගේ ඇවෑමෙන් විසඳෙන බවයි. තවද කෝවිඩ්-19 සම්බන්ධව ප්‍රදේශ කීපයක ඇඳිරිනීතිය පනවා ඇති බවද පවසන ඒ මහතා කොවිඞ් පාලනය කර තිබුණත් මේ වනතෙක් එන්නතක් හෝ සොයා නොගත් පසුබිමක ආරක්‍ෂාකාරීව දිවිගෙවීම සුදුසු බවද පැවසීය.