හර්ෂණ තුෂාර සිල්වා

යුද්ධයෙන් පසු සියල්ලෝම ඒකරාශී කරගන්නා වූ ශ්‍රී ලංකාවක් උදෙසා දැක්මක් නිර්මාණය කරගැනීමට අපට නොහැකි වූයේ යැයි කතානායක කරු ජයසූරිය මහතා අද (19) ප්‍රකාශ කළේය.

දේශමාන්‍ය අල්හාජ් බාකීර් මාකර් මහතාගේ 21 වන ගුණ සමරු දෙසුම පවත්වමින් කතානායක කරු ජයසූරිය මහතා ඒ බව සඳහන් කළේය.

ජාතික එකමුතුව සඳහා වන බාකීර් මාකර් පදනම වාර්ෂිකව සංවිධානය කරන දේශනය මෙවර ‘සියල්ලෝ ඒකරාශී කරගන්නා වූ ශ්‍රී ලංකාවක් උදෙසා දැක්ම’ යන තේමාව යටතේ කොළඹ පදනම ආයතන ශ්‍රවණාගාරයේදී පැවැත්විණි.

මෙහිදි තවදුරටත් අදහස් දැක්වූ කතානායක කරු ජයසූරිය මහතා මෙසේ ද කීය.

         “අප සියලු දෙනාම මිනිසුන් නිසා ජාතිය ආගම කුලය කුමක් වුවත් අප මිනිසුන් ලෙස ජීව විද්‍යාත්මක ලෙස එකම සත්ව කොට්ඨාසයක්. එය අවබෝධ කරගැනීම ඉතා වැදගත්. වර්තමාන ලෝකයේ අප දකින කණගාටුදායක තත්ත්ව බොහෝමයක් අත්විඳින්නේ මේ සත්‍යයට පිටුපා කටයුතු කරන නිසයි.

එක් අයකු තවත් අයකු අභිබවා යෑමට පෙන්වා දෙන හේතු ඉතාමත් ඛේදනීයයි.

ආගමක් තවත් ආගමකට වඩා ඉහළින් සැලකීම, ජාතියක් ලෙස තවත් ජාතියකට වඩා ඉහළින් සැලකීම, කුල ගෝත්‍රයක් තවත් කුල ගෝත්‍රයකට වඩා ඉහළින් සැලකීම වැනි අවාසනාවන්ත සාධක තුළ අද ලෝකය හැම තැනම ගැටුම් නිර්මාණය වී තිබෙනවා. මේවාට දේශපාලනය, බලය ලබාගැනීම වැනි සාධක එක්වීම තුළින් සිදුවන්නේ මහා විනාශයක්.

දශක තුනක කුරිරු යුද්ධයකට පසු ශ්‍රී ලංකාවේ අපි අද මුහුණ දී සිටින අර්බුදය කුමක් ද ? සැබැවින්ම ඔබ අප හමුවේ තිබෙන මාතෘකාව එයයි. සියල්ලෝම ඒකරාශී කරගන්නා වූ ශ්‍රී ලංකාවක් උදෙසා වන දැක්මක් නිර්මාණය කර ගැනීමයි.

වසර 2009 යුද්ධය නිමා වූ පසු අපට මේ ජයග්‍රහණය හිමි කරගැනීමට හැකියාව ලැබුණා ද ? අප එය මඟ හැර කටයුතු කළා යැයි මා විශ්වාස කරනවා”.

ඡායාරූප ශාන්ත රත්නායක