(කාංචන කුමාර ආරියදාස)
 
කාන්තා හා ළමා කටයුතු පිළිබඳ රාජ්‍ය අමාත්‍යවරිය වන විජයකලා මහේෂ්වරන් මහත්මිය එල්ටීටීඊ සංවිධානය ගැන කළ ප්‍රකාශය දකුණේ ජනාධිපති සිහිනය මවාගෙන සිටින අයකුගේ කොන්ත්‍රාත්තුවක් දැයි සැක සිතෙන බව සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා පැවසීය.


කිරි ගොවීන් මුහුණ පා ඇති ගැටලු සම්බන්ධයෙන් අද (5)  දඹුල්ලේ පැවති මාධ්‍ය හමුවකදී මාධ්‍යවේදියකු ඇසූ ප්‍රශ්නයකට පිළිතුරු දෙමින් ඔහු මේ බව පැවසීය.


රාජ්‍ය අමාත්‍යවරිය කළ ප්‍රකාශය තරයේ හෙළා දකින බවත් එහෙත් ඒ පිළිබඳව නැවත වරක් සිතා බැලිය යුතු යැයි ද මේ වන විට දකුණේ කණ්ඩායම් ජනාධිපති උණුසුමෙන් විවිධ රැස්වීම් පවත්වමින් කලඑළි බහින කාලය බවත් සඳහන් කළේය. 


එම නිසා රාජ්‍ය අමාත්‍යවරිය ඒ අයකුගේ කොන්ත්‍රාත්තුවක් මේ ආකාරයෙන් ඉටු කළේ ද යන්න දැඩිව සැකයක් පවතින බව හෙතෙම සඳහන් කළේය.


කිලිනොච්චියේ සේවය කළ මේජර් රත්නප්‍රිය බන්දු වැනි චරිත එම ප්‍රදේශයට තව තවත් ගොනුකර විජයකලා නැමැති චරිතය දෙමළ ජනතාව තුළම කොන් කර දැමිය යුතු බවද හෙතෙම අවධාරණය කළේය.


එම  ප්‍රකාශය අල්ලාගෙන දෙමළ ජනතාවට පහර දෙන්න සූදානම් වෙනවා නම් එමෙන්ම දකුණ ගිනි තියන්නට සූදානම් වෙනවා නම් ඒවාට ඉඩ ලබා නොදිය යුතු බවද හෙතෙම සඳහන් කළේය.


ඉදිරි ජනාධිපතිවරණය සඳහා රැල්ලක් සූදානම් කර ගැනීමට දකුණේ අවධානය දිනාගැනීමට විජයකලා යම්කිසි අන්තවාදීන්ගේ කොන්ත්‍රාත්තුවක් ඉෂ්ඨ කළාද යන සැකය තවදුරටත් තිබෙන බව සඳහන් කළේය.

යම්කිසි මුදලක් ලබාගෙන මෙය සිදු කළේ ද යන්න සැක සහිත බව ද නාමල් කරුණාරත්න මහතා පැවසීය.