(නිමල කොඩිතුවක්කු)
        
ආණ්ඩුවට එරෙහි සියලූම දේශපාලන බලවේග එක්කාසු කරගනිමින් ලැබෙන පළමු අවස්ථාවේදීම වත්මන් ආණ්ඩුව වෙනස් කිරිමට කටයුතු කරන බව හිටපු අමාත්‍ය සුසිල් පේ‍්‍රමජයන්ත මහතා පැවසීය.


ඒකාබද්ධ විපක්ෂය ඇතුළු සියලූම දේශපාලන බලවේගයන් සමඟ ආණ්ඩුවෙන් ඉවත්වූ 16 දෙනාගේ කණ්ඩායම මේ වනවිටත් ඒ සම්බන්ධයෙන් සාකච්ඡා ආරම්භ කර ඇතැයි ඔහු සඳහන් කළේය.


මහරගම පිහිටි මහජන එක්සත් පෙරමුණු ප‍්‍රධාන කාර්යාල පරිශ‍්‍රයේ දී ඒකාබද්ධ විපක්ෂයේ  නායක පාර්ලිමේන්තු මන්ත‍්‍රී  දිනේෂ් ගුණවර්ධන මහතා සමඟ ආණ්ඩුවෙන් ඉවත්ව ගිය 16 කණ්ඩායම අද (22) සිදුකළ සාකච්ඡාවකින් පසුව මාධ්‍ය හමුවේ අදහස් දක්වමින්  හෙතෙම මේ බව පැවසීය.


එහිදී වැඩිදුරටත් අදහස් දැක්වූ සුසිල් පේ‍්‍රමජයන්ත මහතා මෙසේද කීවේය.


   ‘‘රජයෙන් ඉවත්  වෙච්ච මැති ඇමැතිවරුන් කණ්ඩායම විවිධ දේශපාලන පක්ෂ මුණ ගැසීමේ වැඩපිළිවෙළ යටතේ දිනේෂ් ගුණවර්ධන මහතා ඇතුළු එම පක්ෂයේ පිරිස මුණ ගැසුණා. පාර්ලිමේන්තුවේ විපක්ෂයේ කණ්ඩායම සමඟ ඒකාබද්ධ වෙලා කටයුතු  කරන්නේ කොහොමද කියන කාරණාව පිළිබඳ අපි එහිදී සාකච්ඡා කළා.


එක්සත් ජාතික පක්ෂ ආණ්ඩුවක් වෙනස් කිරීම  සඳහා පුළුල් සංවිධානයකට  යාමට අවශ්‍ය පියවර ගන්නේ කොහොමද කියලා අපි මේ සාකච්ඡාවේදී තිරණය කර ගත්තා.  මැතිවරණයක් පැවැත්වෙන දිනය පිලිබඳ අපිට දැන්ම  කියන්න බැහැ. නමුත් ලැබෙන ප‍්‍රථම  අවස්ථාවකදීම මෙම ආණ්ඩුව වෙනස් කළ යුතුයි කියන  ස්ථාවරයක අපි සියලූ දෙනාම ඉන්නවා.


රජය මොන වගේ තීරණ ගත්තත් ජනතාව ඉතාම දැඩි කළ කිරිමකයි ඉන්නේ. ඒ අනුව ජනතාවගේ ප‍්‍රශ්න විසදීම  සඳහා  කොහොමද කටයුතු කරන්නේ කියලාත් අපි සාකච්ඡා කළා.  


දේශපාලන පක්ෂ  අතර  ප‍්‍රතිපත්තිමය වෙනස්කම් තියෙන්න පුළුවන්.  නමුත් මේ ආණ්ඩුව ඉක්මණින් වෙනස් කරන්නේ  කොහොමද කියන එක ගැන අපි අතර  පොදු එකඟත්වයක් තියෙනවා. ඒ සඳහා ඒකරාශි කරගන්න පුළුවන් සියලූ බලවේග  ඒකරාශී කර ගත යුතුයි. ඒ සඳහා සියලූ  සහයෝගය ලබා දෙන්න අපි සූදානම් යැයිද ඔහු වැඩිදුරටත් කියා සිටියේය.