(නිමල කොඩිතුවක්කු)
    
මහින්ද රාජපක්ෂ මහතා  ඉන්දියාවට ගොස් රෑ දනියෙල් දවල් මිගෙල් ක්‍රමවේදය අනුගමනය කරන බව එක්සත් ජාතික පක්ෂයේ ගම්පහ  දිස්ත්‍රික් පාර්ලිමේන්තු මන්ත්‍රී හර්ෂණ රාජකරුණා මහතා කොළඹදී  පැවසීය.


මහින්ද රාජපක්ෂ මහතාගේ දෙබිඩි පිළිවත හේතුවෙන් එක් පැත්තකින්  ඉන්දියාවත්   අනික් පැත්තෙන් ලංකාවේ ජනතාවත්   රැවටෙන බව ද මන්ත්‍රීවරයා සඳහන් කළේය.


පිටකෝට්ටේ පිහිටි සිරිකොත එක්සත් ජාතික පක්ෂ මූලස්ථානයේ අද (13) පැවති මාධ්‍ය හමුවකට එක්වෙමින් ඒ මහතා මේ බව පැවසීය.


මාධ්‍ය හමුවේ අදහස් දැක්වූ පාර්ලිමේන්තු මන්ත්‍රී හර්ෂණ රාජකරුණා මහතා වැඩිදුරටත් මෙසේද කීවේය.


 “ හිටපු ජනාධිපති මහින්ද  රාජපක්ෂ මහතාගේ ඉන්දියානු සංචාරය පිළිබඳ විශාල මාධ්‍ය අවධානයක් යොමුවෙලා තියෙනවා.


මහින්ද රාජපක්ෂ මහතතා හදිසියේ ඉන්දියාවේ  සංචාරය කිරීම පිළිබඳ කරුණු කිහිපයක් ඔස්සේ අපිටත් සැක පළ වෙනවා. එතුමා කලින් ඉන්දීය අගමැති මන්මෝහන් සිං සිටියදී ඉන්දියාවට ගොස් දහතුනෙන් එහා ගහපු විසඳුමක් ලබාදෙන්න එකඟ වුණා. එහෙම කරලා ලංකාවට ඇවිත් කියන්නේ වෙන දෙයක්.  


මහින්ද රාජපක්ෂ මහතා  ඉන්දියාවට ගිහින් අනුගමනය කරන්නේ  රෑ දනියෙල් දවල් මිගෙල් ක්‍රමවේදයයි. අදත් එම ක්‍රමවේදයම  කරමින් එක පැත්තකින් ඉන්දියාව රවට්ටනවා. අනික් පැත්තෙන් ලංකාවේ ජනතාව  රවට්ටනවා.


ඉන්දියාවට ගිහින් කියනවා  චීනය හොඳ නැහැ කියලා. චීනයට ගිහින් කියනවා  ඉන්දියාව හොඳ නැහැ කියලා  ලංකාවට ඇවිත් කියනවා ඉන්දියාවත්  හොඳ නැහැ චීනයත් හොඳ නැහැ කියලා. මේ ක්‍රමවේදය තමයි අද ඔහු අනුගමනය කරන්නේ.


කළු කොඩි වලින් මුළු රටම පුරවන්න ඕන කියලා මෝදි අගමැතිතුමා ලංකාවට එද්දි කිවුවා විමල් වීරවංශ මහතා පැවසුවා. දැන් මෝදි අගමැතිතුමා  මහින්ද රාජපක්ෂ මහතා හමුවෙලා සාකච්ඡා කරද්දි දැන් විමල් වීරවංශලා මොකද කියන්නේ කියලා අපි අහනවා.

ඡායාරූප - ගයාන් අමරසේකර