(ජයන්ත සමරකෝන්)

විධායක ජනාධිපති ධුරය අහෝසි කිරීමේ ජාතික විමුක්ති පෙරමුණු යෝජනාව මුළුමනින්ම ඔවුන්ගේ මනෝ රාජ්‍ය සංකල්පයක් පමණක් යැයි ද ඉහළම ප්‍රජාතන්ත්‍රවාදය ස්ථාපිත කිරීමට යාමෙන් රටක් අස්ථාවර වීමට හෝ අරාජික වීමට ඉඩ දිය නොහැකි යැයි ද මහා නගර හා බස්නාහිර සංවර්ධන අමාත්‍ය ජාතික හෙළ උරුමයේ මහ ලේකම් පාඨලී චම්පික රණවක මහතා ඊයේ (28) පැවැසීය.

මෙය එක වර්ගයක ගෙයක් ඉදිකිරීමට දැමූ අත්තිවාරමක් මත ඊට සහමුලින්ම වෙනස් ගෙයක් ඉදිකිරීමට සමාන දෙයක් බව ද බත්තරමුල්ල ජාතික හෙළ උරුමයේ ප්‍රධාන කාර්යාලයේ ඊයේ (28) පැවැති ප්‍රවෘත්ති සාකච්ඡාවකදී අමාත්‍යවරයා කීය.

විසි වැනි සංශෝධනය හරහා විධායක ජනාධිපති ධුරය බලරහිත කිරීම පිළිබඳව ජාතික හෙළ උරුමයේ ස්ථාවරය පැහැදිලි කිරීම සඳහා මෙම මාධ්‍ය සාකච්ඡාව පැවැත්විණි.

එහිදී අදහස් දැක්වූ අමාත්‍යවරයා මෙසේ ද පැවැසීය.

“ආණ්ඩුක්‍රම ව්‍යවස්ථාවක් යනු විධායකයේ ස්වභාවය පිළිබඳ ප්‍රතිපාදන පදනම් කරගෙන ගොඩනඟා ක්‍රියාත්මක කරනු ලබන ඓන්ද්‍රීය පද්ධතියක්.

දැනට මෙරට ක්‍රියාත්මක වන්නේ අර්ධ ජනාධිපති නැත්නම් මිශ්‍ර ක්‍රමයක්. ලංකාවේ සමස්ත ආණ්ඩුක්‍රම ව්‍යවස්ථාව සකසා ඇත්තේ ඊට ගැළපෙන අයුරින්ම. එසේ යම් නිශ්චිත ආකෘතියකට අවශ්‍ය පරිදි ගොඩනඟා ඇති ආණ්ඩුක්‍රම පද්ධතියකට ඊට සහමුලින්ම වෙනස් කැබිනට් ක්‍රමය කෘත්‍රිම ලෙස පූට්ටු කිරීමට උත්සාහ ගැනීම අවදානම් සහගත කටයුත්තක්.

මෙහි ප්‍රතිඵලය ව්‍යසනකාරී එකක්වීමේ ඉඩකඩ වැඩියි.

ඒ අනුව ජවිපෙ යෝජිත විසිවන ව්‍යවස්ථා සංශෝධනය අතිශයින්ම වැරැදි සහගත එකක්.
රටක ස්ථාවරභාවය පිළිබඳ කරුණු නොසලකා මූලධර්මවාදී ආකාරයෙන් ලෝකයේ ඉහළම ප්‍රජාතන්ත්‍රවාදය ස්ථාපිත කිරීමට ජවිපෙ ගන්නා උත්සාහයෙන් සිදුවන්නේ රට අස්ථාවර හා අරාජික තත්ත්වයට පත්වීම පමණයි.
නේපාලය හා මාලදිවයිනට අද ඇති වී තිබෙන්නේ එවැනි ආකාරයේ ප්‍රතිසංස්කරණවල ප්‍රතිඵලයි.
එම රටවල අද වනවිට ප්‍රජාතන්ත්‍රවාදයත්, ස්ථාවර භාවයත් දෙකම නැතිවෙලා.

1978 ව්‍යවස්ථාවෙන් ක්‍රියාත්මක වූ ජනාධිපති ක්‍රමය සමඟ එම මැතිවරණ ක්‍රමය තිබෙන්නට ඉඩ හැරියා නම් එමඟින් අසීමාන්තික ඒකාධිපති ක්‍රමයක් ඇති වෙනවා.

නව ක්‍රමයෙන් සිදුවූයේ ජනාධිපති ධුරයේ බලය නංවන අතර, විධායකයේ නායකත්වය යටතේ පවතින ආණ්ඩු පක්‍ෂයට විශාල බලයක් නොලැබෙන මැතිවරණ ක්‍රමයක් ඇතිකිරීමයි. එනම් සමානුපාතික ක්‍රමයයි.

කැබිනට් ක්‍රමය හා සරල බහුතර මැතිවරණ ක්‍රමයත්, ජනාධිපතිවරණ ක්‍රමය හා සමානුපාතික මැතිවරණ ක්‍රමයත් ශ්‍රී ලංකාවේ අත්‍යවශ්‍ය අනුපූරකයන්ය. වෙනස් කරනවා නම් මේ දෙකම වෙනස් විය යුතුයි.

විසිවන සංශෝධනය මඟින් යෝජනා කරන්නේ සමානුපාතික ක්‍රමය තිබියදී ජනාධිපති ධුරය අහෝසි කිරීමටයි. එහි ප්‍රතිඵල භයානකයි.

ජනාධිපති ක්‍රමය ප්‍රජාතන්ත්‍ර විරෝධීය යන අදහස පදනමක් නැති එකක්.
අප කළ යුත්තේ ජනාධිපති ක්‍රමය අහෝසි කිරීම නොව එය ප්‍රජාතන්ත්‍රීකරණය කිරීමයි.
19 වන සංශෝධනය මගින් එහි යා හැකි උපරිම දුරට එම අරමුණු ඉටුකර අවසන්.
ජනතාවට අවශ්‍ය ව්‍යවස්ථා වෙනසක් නොව මේ රට රටක් ලෙස සංවර්ධනය වනු දැකීමයි.
ඡන්ද ක්‍රමය වෙනස් නොකර ජනාධිපති ක්‍රමය වෙනස් කිරීමෙන් භයානක ප්‍රතිඵල ඇතිවිය හැකියි.
මේ දෙකම එකට තිබිය යුතුය යන ස්ථාවරයේ අපි එදත් සිටියා, අදත් සිටිනවා. මෙය වෙනස් වුණොත් රට අස්ථාවර වේවි.

මෙබඳු අතිශයින්ම තීරණාත්මක කරුණක් සම්බන්ධයෙන් තීරණ ගත යුත්තේ රටේ යහපතට ප්‍රමුඛතාව ලැබෙන පරිද්දෙන්.

නව ව්‍යවස්ථාව සංශෝධනයකට අපි සූදානම්. නමුත් ජවිපෙ ඉදිරිපත් කර ඇති විසිවන සංශෝධනයට අපි එකහෙළාම විරුද්ධයි.”

වෘත්තීය පුහුණු හා නිපුණතා සංවර්ධන නියෝජ්‍ය අමාත්‍ය කරුණාරත්න පරණවිතාන, බස්නාහිර පළාත් සභා මන්ත්‍රී නිශාන්ත ශ්‍රී වර්ණසිංහ යන මහත්වරු ද මෙම අවස්ථාවට එක්වූහ.