මීතොටමුල්ල කසළ කන්දේ කොටසක් කඩාවැටීමෙන් විපතට පත් ජනතාවට උපරිම සහන සලසන ලෙසත්, එහිදී මුදල් පිළිබඳ කිසිදු ගැටලුවක් ඇතිකර නොගන්නා ලෙසත් ජනාධිපති මෛත්‍රීපාල සිරිසේන මහතා නිලධාරීන්ට උපදෙස් දී ඇත.

විපතට පත් පවුල් සංඛ්‍යාව හා හානි වූ දේපළ සම්බන්ධයෙන් නිසි තක්සේරුවක් කර දින පහක් ඇතුළත වාර්තාවක් තමාට ලබාදෙන්නැයි නිලධාරීන්ට උපදෙස් දී ඇති ජනාධිපතිවරයා සියලු කටයුතු ජනතාවගේ චෝදනාවට ලක් නොවන අයුරෙන් කිරීමට සැළකිලිමත් වන්නැයි දැනුම් දී ඇත.

ජනාධිපතිවරයා මෙම උපදෙස් ලබා දී ඇත්තේ විපතට පත් ජනතාවට සහන සැළසීමේ අරමුණෙන් ආපදා කළමනාකරණ අමාත්‍යංශයේදී ඊයේ (16) පෙරවරුවේ පැවැති සාකච්ඡාවකදීය.

තවදුරටත් අවදානමට ලක්ව ඇති ජනතාව එම ස්ථානවලින් ඉවත් කර ඔවුන් ආරක්ෂිත ස්ථාන කරා කඩිනමින් යොමු කරන්නැයි ද එම යොමුකිරීම් ජනතාවට අවශ්‍ය යටිතල පහසුකම් සහිතව සිදුකරන්නැයි ද ජනාධිපතිවරයා උපදෙස් දී තිබේ.

මීතොටමුල්ල වී අලෙවි මණ්ඩලයේ ගබඩා තුනක් තාවකාලිකව යොදාගැනීම ගැන මෙහිදී අවධානය යොමුවී ඇති අතර විපතට පත් ප්‍රදේශවාසීන් සෙවීමේ හා මුදාගැනීමේ ක්‍රියාන්විතයේ ප්‍රගතිය ගැන ද කරුණු ඉදිරිපත් වී තිබේ.

මරණයට පත්වූවන්ගේ අවමංගල්‍ය කටයුතු සොයා බලා ඉටුකරන ලෙස ද දින තුනකට වරක් ප්‍රගති සමාලෝචන රැස්වීමක් කැඳවීමට ද ජනාධිපතිවරයා උපදෙස් දී ඇත.

ඒ අනුව මීළඟ රැස්වීම 19 වැනිදා උදේ 8.30 ට ආපදා කළමනාකරණ අමාත්‍යංශයේදී පැවැත්වීමට නියමිතය.
අමාත්‍යවරුන්වන අනුර ප්‍රියදර්ශන යාපා, සුසිල් ප්‍රේමජයන්ත, රාජිත සේනාරත්න, පාඨලි චම්පික රණවක, විජයදාස රාජපක්ෂ, ඒ.එච්.එම් ෆවුසි, පාර්ලිමේන්තු මන්ත්‍රී එස්.එම් මරික්කාර් හා ප්‍රසංග සෝලංගආරච්චි යන මහත්වරුන් ද පොලිස්පති, ත්‍රිවිධ හමුදාපතිවරුන් ඇතුළු ආරක්ෂක අංශ ප්‍රධානීන් සහ රාජ්‍ය නිලධාරීහු පිරිසක් මෙම සාකච්ඡාවට සහභාගීවී සිටියහ.