(රන්න චන්ද්‍රසේන ගමගේ) 


ලබන 04 වැනි දින පැවැත්වෙන 70 වැනි නිදහස් උළෙලේ ප්‍රධාන ආරාධිතයා වශයෙන් බ්‍රිතාන්‍යයේ  එඩ්වඩ් කුමරු සහභාගි කරවා ගැනීමට ආණ්ඩුව කටයුතු කිරීම  මේ පාලකයන් ගේ නිවටකම ප්‍රදර්ශනය කිරීමක් බව හිටපු ජනාධිපති මහින්ද රාජපක්ෂ මහතා අගුණකොළපැලැස්සේ පැවති ශ්‍රී ලංකා පොදු ජන පෙරමුණේ පලාත් පාලන මැතිවරණ ප්‍රචාරක රැළියේදී පැවසීය.


මෙම රැළියේදී අදහස් දැක් වූ මහින්ද රාජපක්ෂ මහතා, “ මේ රට යටත් කර ගෙන හිටපු රටක නායකයෙකු ගෙන්වා මේ රටේ නිදහස් උළෙලක් පැවැත් වීම සුදුසු දෙයක් විධියට මම සලක්නේ නෑ. එඩ්වඩ් කුමාරයා වෙන උත්සවයකට ගෙනාවානම් ඒක වරදක් විධියට මම දකින්නේ නෑ .මමත් චෝගම් එකට චාල්ස් කුමාරයත් ගෙන්නුවා . එඩ්වඩ් කුමාරයාට සුභ පතන ගමන්ම මම මේ ආණ්ඩුව වැටී ඇති තත්වය ගැනද කණගාටු වෙනවා.

අද බලන්න මේ ආණ්ඩුව  රට වටේම තියෙන අපේ භූමි භාගය පිටරට වල් වලට විකුණනවා. දකුණ  චීනෙට  ඉන්දියාවට උතුර ඉන්දියාවට නැගෙනනහිර ඉන්දියාවට සිංගප්පූරුවට කොළඹ චීනෙට උකස් කරනවා.පිට රටවල් වලට මේ රට පාවා දෙන්න ආණ්ඩුව පියවර අරගෙන තිබෙනවා.මේ ඡන්දයේදී පොදු ජන පෙරමුණට දෙන ඡන්දය රට විකුණනවාට විරුද්ධව දෙන ඡන්දයක් වගේම ප්‍රභාකරන්ට කර ගන්න නොහැකි වූ දේ සිදු කරන්න මාන බලන සම්බන්ධලාට විරුද්ධවත් දෙන ඡන්දයක් බව අමතක කරන්න එපා.“ යැයිද පැවසීය.