(නාලක සංජීව දහනායක)
 
පාතාල ක‍්‍රියාකාරකම් නිසා යුද සමයටටත් වඩා මිනිසුන්ගේ ජීවිත අනාරක්‍ෂිත තත්ත්වයට පත්ව ඇතැයි පාර්ලිමේන්තු මන්ත‍්‍රී ශෙහාන් සේමසිංහ මහතා අද (28) පැවසීය. 
 
පාතාලය මර්දනය කර සියලූම මිනිසුන්ගේ ආරක්‍ෂාව තහවුරු කිරීමට ආණ්ඩුව වහාම ක‍්‍රියාත්මක වියයුතු යැයිද මන්ත‍්‍රීවරයා කීය.   
 
මන්ත‍්‍රීවරයා මෙසේද කීය.
 
‘පාතාලයේ නැගිටීමත් සමඟම රටේ සියලූම මිනිසුන්ගේ ජීවිත බරපතළ අනතුරකට ලක්වෙලා. පක්‍ෂ භේදයෙන් තොරව සියලූම මිනිසුන්ගේ ආරක්‍ෂාව තහවුරු කිරීම සෑම ආණ්ඩුවකම වගකීමක්. නමුත් අද වනවිට එල්.ටී.ටී.ඊ පාලන කාලයටත් වඩා සාමාන්‍ය ජනතාවගේ ජීවිත අනාරක්‍ෂිත වෙලා. නිවරදිව නීතිය ක‍්‍රියාත්මක කරනන් පොලීසියට අවස්ථාව දෙන්න  ඕනෑ. නමුත්  දේශපාලන බලපෑම් නිසා මේ තත්ත්වය පාලනය කරන්න පොලීසියට නොහැකි තත්ත්වයක් උදාවෙලා තිබෙනවා.
 
 පසුගිය 19 වැනිදා සිට 26 වැනිදා දක්වා වූ සතියක කාලයකදී මනුෂ්‍ය ඝාතන 15ක් පමණ සිදුවී තිබෙනවා. මේ තත්ත්වය නතර කිරීම රජයේ වගකීමක්. උතුරු ප‍්‍රදේශයේදී එල්.ටී.ටී.ඊ ක‍්‍රියාවන්ට සම්බන්ධ පුද්ගලයන් ආයුධ සමඟ අත්අඩංගුවට පත්වෙනවා. දකුණු පළාතේ පාතාලය හිස ඔසවනවා. බලය ලැබුණු ගමන්ම බුද්ධි අංශ නිළධාරීන් සිරගත කළා. ඒ නිසා විවිධ අපරාධකරුවන්ට, මංකොල්ලකරුවන්ට නිදහසේ හිස ඔසවන්න අවස්ථාවක් ලැබිලා තියෙනවා. දිනපතාම සිදුවන මන්ෂ්‍ය ඝාතන හා මංකොල්ල කෑම් නිසා අපේ රට ජාත්‍යන්තරයේ පිරිහීමට ලක්වෙනවා. ආයෝජකයන් නොඑන නිසා ආර්ථිකය කඩා වැටෙනවා.‘
 
ඒකාබද්ධ විපක්‍ෂය විසින් බොරැල්ල, ආචාර්ය එන්.එම් පෙරේරා කේන්ද්‍රයේ අද (28) පැවැත්වූ මාධ්‍ය හමුවකට එක්වෙමින් ඒ මහතා මේ බව සඳහන් කළේය.