(සිටිනාමළුව - අනීෂා මානගේ)

මැතිවරණයට දැන් අපි සූදානම් වෙලා තියෙනවා. අනෙක් පක්ෂ එක්කත් අපි සාකච්ඡා කරනවා. පෙරමුණක් විදියට අපි ඡන්දය ඉල්ලන්න බලාපොරොත්තු  වනවා යැයි හිටපු ජනාධිති මහින්ද රාජපක්ෂ මහතා පැවසීය. 

හිටපු ජනාධිපති මහින්ද රාජපක්ෂ මහතා මෙසේ පැවසූයේ ඊයේ 3 වැනිදා තංගල්ල කාර්ල්ටන් නිවෙසේදීය. 

කලාකරුවන් 150ක පමණ පිරිසක් මේ වන විට තමන් හමුවට පැමිණ සිටින බව සඳහන් කළ හිටපු ජනාධිපතිවරයා එම කලාකරුවන් තමන්ට සහයෝගය දීමට සූදානමින් සිටින බවත් ඒ අයගෙන් සෑහෙන  පිරිසක් මැතිවරණයට ඉදිරිපත් වන බවත් සඳහන් කළේය. 

මාලිනී ෆොන්සේකා, බන්දුල විජේවීර, රෝහණ බැද්දගේ මහතා ඇතුළු කලාකරුවන් හා කලාකාරිනියෝ රැසක් තංගල්ල කාර්ල්ටන් නිවෙසට පැමිණ මහින්ද රාජපක්ෂ මහතා සමග සුහද කතාබහක නිරත වූහ. ඔවුන් සමග කළ සාකච්ඡාවෙන් අනතුරුව මාධ්‍යවේදීන් හමුවේ අදහස් දක්වමින් මහින්ද රාජපක්ෂ මහතා මෙසේ පැවැසීය.

පාර්ලිමේන්තුවේදී නාමල් රාජපක්ෂ මන්ත්‍රීතුමා ඇතුළු කිහිප දෙනෙක් හම්බන්තොට වරාය සිදුවීම පිළිබඳව කතා කළා. මම ඇමතිවරයටත් කතා කළා. මොකද ආබිට්රේෂන් එකක් තියෙන වෙලාවක කම්කරුවෝ එළවන්න බැහැ.

ඒත් මේ අය කම්කරුවෝ එළවලා තියෙනවා. අපි බලාපොරොත්තු වෙනවා මේ ගැන අදාල සමාගමටත් කතා කරලා කියන්න මේ වැඬේ කරන්න බැහැ කියලා. සමාගමට අයිතියක් නැහැ මෙයාලා එළවන්න. වරාය තමයි මේකට වගකියන්න ඕන. වරාය කියලා පොරොන්දු වෙලා තමයි මේව දුන්නේ. ඒ වෙලාවේ කිව්වා ඔක්කොටම රැකියා තියෙනවා කියලා වරාය ඇමැතිවරයා. ඔක්කොටම රැකියා දෙනව කියපු එක දැන් හාරසිය ගානකට රැකියා නැති වෙලා තියෙනවා. 

සමහර තරුණයෝ විවාහ වෙන්න යෝජනා කරලා විවාහ වෙන්න ලෑස්ති වෙලා ඉන්නවා. සමහරු විවාහ වෙලා තියෙනවා. සමහරු ණය අරගෙන ගෙවල් හදල තියෙනවා. ඒකට ගෙවන්නේ කොහොමද. තරුණයෝ අද සැලැස්මක් එක්කයි වැඩ කරන්නේ. ගේ හදපු එකට ණය ගන්නේ සථිර රැකියාවක් තියෙනවා කියන විශ්වාසය අනුව.

ඒ විශ්වාසය නැති වෙලා ගියාම මේ අය ඉතාම අනාථ තත්ත්වයට පත් වෙනවා. මේවට ආණ්ඩුව වග කියන්න ඕනෑ. කම්කරු ඇමැතිවරයා ඔවුන්ගේ නීතිය ක්‍රියාත්මක කරන්න ඕන. ඒ වගේම රජය වහාම මැදිහත් වෙලා මේ හාරසිය ගානට නැවත රැකියා ලබා දීමේ වැඩපිළිවෙලකට යන්න ඕන.