එෆ්.අස්ලම්
 
යුද්ධයෙන් සිදුවූ විනාශයේත් එල්.ටී.ටී.ඊ නායක වේළුපිල්ලේ ප්‍රභාකරන් ඝාතනය වීමේත් සම්පූර්ණ වගකීම ඉලංගයි තමිල් අරසු කච්චි පක්ෂය විසින් බාරගත යුතු බව දෙමළ විමුක්ති පෙරමුණේ නායක වී.ආනන්ද සංගරි මහතා සඳහන් කළේය.


මඩකලපුව කල්කුඩා ප්‍රදේශයේ දෙමළ එක්සත් විමුක්ති පෙරමුණේ රැස්වීමකට එක් වෙමින් සංගරි මහතා මේ බව කියා සිටියේය.


ප්‍රභාකරන්ව මම හදුනන්නේ ඔහු කුඩා කල සිටයි. ඔවුන් කරපු ඇතැම් වැරදි මා මීට පෙරාතුවම කියල තියෙනවා. මම එදා පෙන්වා දුන්න ඒ වැරදි අද සනාථ වෙලා තියෙනවා. මම කොටි සංවිධානය විනාශ කිරීමටත් එම සංවිධානය පාවා දීමටත් උත්සහා කළා කියලා බොරු කතන්දර ප්‍රචාරය කරල ඇතැමුන් මට ද්‍රෝහියා කියන ලේබලය අලවන්න හදනවා.


කොටි සවිධානය පැවසු ආකාරයට සියළුම දෙමළ දේශපාලන පක්ෂ  එක්සත් වී ජනතාවට සේවය කරන්න මූලිකත්වය ගත්තා නම් එක්සත්ව මැතිවරණයට මුහුණ දුන්නා නම් 2004 අප්‍රේල් මාසයේම යුද්ධය ඉවර කරන්න තිබුණා.


නමුත් අවසානයේ සිදුවුණේ මොකක්ද? දෙමළ ජනතාව අද සිටින තත්වයට ඉලංගයි තමිල් අරසු කච්චි පක්ෂය වග කියන්න ඕනෑ. මෙය සම්බන්ධන් හෝ මාවෙයි සේනාධිරාජා හෝ ප්‍රතික්ෂේප කරයිද? එසේ ප්‍රතික්ෂේප කරනවා නම් ඒ ගැන කතා කරන්න තමන් හා විවාදයකට එන්නැයි මා අභියෝග කරනවා.


එදා දෙමළ පක්ෂ එකතු වෙලා තිබුණා නම් ප්‍රභාකරන් තවමත් ජීවමානව සිටිනු ඇති. ජනතාවට මේ වගේ පීඩාවකුත් අත්විදින්නට සිදු නොවනු ඇති. මේ සියල්ලටම වගකිව යුත්තේ තමිල් අරසු කච්චි පක්ෂයයි.