විනීතා එම් ගමගේ

අතු ගා දැමුණු කොටි සංවිධානය යළි නැගිටිමින් සිටින්නේ නම් ඒ බව නොසඟවා ජනතාවට පවසන්නැයි පිවිතුරු හෙළ උරුමයේ නායක පාර්ලිමේන්තු මන්ත‍්‍රී උදය ගම්මන්පිල මහතා ප‍්‍රකාශ  කළේය.

යුද්ධය අවසන් වී ගෙවුණු වසර 9 පුරාවට කිසිම තැනක බස් රථයක බෝම්බයක් පුපුරා නොමැති බවත් ග්‍රෙනේඞ් බෝම්බයක්  පිරිපිරීමෙන් මේ තරම්  හානියක් සිදු විය නොහැකි බවත් මන්ත‍්‍රීවරයා කීය.

රටට ඇත්ත කිව්වොත් මුළු සමස්ථ ජාතියටම සුදානම් වෙලා  එදා වගේම අදත්  හමුදාව පිටුපසින් ආණ්ඩුව පිටුපසින් එක මිටියට හිටගෙන මතුවෙන ත‍්‍රස්තවාදය දල්ලෙන් කඩන්න උදව් කරාවි යැයි ද ගම්මන්පිල මහතා පැවැසීය.

මන්ත‍්‍රීවරයා මේ අදහස්  පළ කළේ පිටකෝට්ටේ පිහිට පිවිතුරු හෙළ උරුමය ප‍්‍රධාන කාර්යාලයේ ඊයේ පැවැති මාධ්‍ය හමුවක් අමතමිනි. එහි දී තවදුරටත් අදහස් දැක්වූ මන්ත‍්‍රීවරයා මෙසේ ද කීය.

‘‘ බණ්ඩාරවෙල දී බස් රථයක බෝම්බයක් පුපුරා බස් රථයම ගිනි ගෙන 19 දෙනෙක් තුවාල ලැබුවා. එක් හමුදා භටයකු ගේ පාදයෙන් කොටසක් සැත්කමක් මගින් ඉවත් කිරීමටද සිදුවුණා.  මේ පිළිබද ආණ්ඩුවේ පුර්ව නිගමණය වී තිබෙන්නේ යුධ හමුදා භටයෙකු ගෙන ගිය අත් බෝම්බයක් පිපිරීමෙන් මේ මහා විනාශය සිදුවුණා කියලා.

මාධ්‍යවේදීන් ඉතාමත්ම නිවැරදිව ප‍්‍රශ්න කළා මේ ත‍්‍රස්තවාදී ක‍්‍රීයාවක් විය හැකියි නේද කියලා.  හමුදා මාධ්‍ය ප‍්‍රකාශක දුන්නේ අපූරු පිළිතුරක්.  මේක ත‍්‍රස්තවාදි ක‍්‍රියාවක් කිව්වොත් ජනතාව බය වෙනවානෙ. හමුදා මාධ්‍ය ප‍්‍රකාශක පැවසුවේ ඒ ආකාරයෙනුයි. එහෙම නම් මෙය ත‍්‍රස්තවාදීන්ගේ ක‍්‍රියාවක් යැයි ප‍්‍රකාශ නොකර සිටීමට හේතුව තමයි ජනතාව බියවීම වැලැක්වීම.

ඇත්තෙන්ම ජනතාව බිය වෙන්නේ ඇත්ත සැඟවීමෙන් මිස ඇත්ත හෙලි කිරීමෙන් නොවේ.  බෝම්බ පත්තු කිරීමෙන් පසු මෙන්ම පිපිර වීමට පෙර ද බෝම්බකරුවන් අල්ලා ගැනීමට ජනතාවගෙන් විශාල සේවයක් වුණා.  මේ යුද ජයග‍්‍රහණය ලැබීමට සාමාන්‍ය ජනතාවගෙන් ලැබුණු දායකත්වය අමතක කරන්න එපා.  බුද්ධි අංශවල ඇස් සහ කන් බවට සමස්ත ජාතියම පත් වුණා.   සාමාන්‍ය ජනතාවට ඇත්ත පැවසුවොත් ජනතාව වඩාත් විමසිලිමත් වේවි.  වඩාත් පරිස්සම් වේවි.  එවිට බණ්ඩාරවෙල සිද්ධිය වැනි අවාසනාවන්ත සිදුවීම් යළි නොවේවි.

හමුදා භටයෙකු පාතාලයට විකිණීම සඳහා අත් බෝම්බයක් සොරකම් කර ගෙන පැමිණි බවටත් ඔහු බස් රථයේ ඉන්ධන ටැංකිය අසළ වාඩි වී සිටිය දී බෝම්බය පුපුරා යෑමෙන් මේ අනතුර සිදු වුණු බවටත් කතාවක් ගොතා හමුදා භටයාට දඬුවම් කර මේ ප‍්‍රශ්නය අවසන් කිරීමට කටයුතු කරන බවට හමුදා ආරංචි මාර්ග පවසනවා. 

අත්බෝම්බ ප‍්‍රහාර අපිට අළුත් අත්දැකීමක් නොවේ.  යුද සමයේ ත‍්‍රස්තවාදින් ද යුද්ධය ඇතත් නැතත් පාතාලය ද අත්බෝම්බ පුපුරුවනවා. ජනතා විමුක්ති පෙරමුණ 71 කැරැල්ල සදහා විශාල වශයෙන් අත්බෝම්බ යොදා ගත්තා. අත් බෝම්බයකින් මෙතරම් විනාශයක් සිදුවෙන්න බෑ කියන එක අපි වගකීමෙන් කියනවා.  මේ සදහන් කරන ආකාරයටනම් මේ බෝම්බය බස් රථයේ තෙල් ටැංකිය ගාවම තියන් යන්න  ඕනෑ. එසේ තෙල් ටැංකිය අසල තබාගෙන යන මොහොතේම පුපුරන්නත්  ඕනෑ. උතුරේ යුධ සමයේ නම් අත්බෝම්බ ආරක්ෂක අගුල ගලවා පින් එක අදින මට්ටමින් අරන් යනවා කොයි වෙලේ මෙය භාවිතා කරන්න වෙයිද නොදන්න නිසා.

නමුත් අපි මදකට සිතමු හමුදා භටයෙක් යාපනයේ සිට හොරකම් කරගෙන ආවා කියලා පාතාලයට විකුණන්න. එයාට මොකක්ද තියෙන අවශ්‍යතාවය බණ්ඩාරවෙලදී මේ ආරක්ෂක අගුල අරින්න. මේක බෑගයක් ඇතුලේ තිබුනානම් පින් එක ඉවත්කර තිබුනොත් තමයි හෙල වීමෙන් තෙරපීමකින් තදවීමෙන් ඇතැම් විට පින් එක ඇරෙන්න පුලූවන් වෙන්නේ.  යම් කිසි ආයාසයක් පින් එක අදින්නට  ඕනෑ. මේක පීඩන බෝම්බයක් නොවෙයි. ඉතාම පැහැදිළිව හදුනාගෙන තියෙනවා ග්‍රෙනේඞ් එකක් ලෙස. එහෙමනම් අපි අභියෝග කරනවා ආණ්ඩුවට අපිට කියන්න කවදා කොතැනද ග්‍රෙනේඞ් එකකින් 19 දෙනෙක් තුවාල වෙලා බස් එකක් ගිණි ගත්තේ. යුධ සමයේදීවත් එහෙම වෙලා නෑ.

මේක සුළු පටු සිද්ධියක් නොවේ. ආණ්ඩුව කියන්න උත්සහ දරන කතන්දරය මොකක් ද? යුධ හමුදා භටයෙකු ගේ ගමන් මල්ලේ සොරකම් කරගෙන ආ අත්බෝම්බයක් තිබුණා. එය ඔහු රැුගෙන ආවේ පාතාලයට විකුණා දමන්නයි. ඔහු හරියටම බස් රථයේ තෙල් ටැංකිය ගාව වාඩි වී ආවා. බෝම්බය පිපිරුණා. තෙල් ටැංකිය ගිනිගත්තා. එහි ප‍්‍රතිපලයක් ලෙස බස්රථය ගිනිගත්තා. බෝම්බයක් සොරකම් කිරීම, පාතාලය සමග සබදතා පැවැත්වීම. මහජනතාවට අනතුරක් සිදුකර මිනීමැරුමට තැත්කිරීම යනාදී චෝදනා මත මේ හමුදා භටයා කෝට් මාෂල් කරයි.

සාමාන්‍ය අධිකරණයකින් දඩුවම් කරල සිරගත කරලා මේ ප‍්‍රශ්නය අවසන් කරයි. හැබැයි එහෙම කලොත් ත‍්‍රස්තවාදියා මේ මුළු රටම අල්ලාගන්නා තුරු අප දැන සිටින එකක් නම් නෑ.

මතක තියා ගන්න. වසර දෙකක් තුල මරා ගෙන මැරෙන බෝම්බ කට්ටල දස දහසකට වඩා උතුරින් ලැබුණු බව හිටපු ආරක්ෂක ලේකම් කරුණාසේන හෙට්ටිආරච්චි මහතා කිව්වා.  වල දැමූ ආයුද සහ පුපුරණ ද්‍රව්‍ය  නිරතුරුව උතුරින් ලැබුණා. පුපුරණ ද්‍රව්‍ය  පිලිබද විශේෂඥයන් නම් කියන්නේ වසර නවයක් සුරක්ෂිතව පුපුරණ දව්‍ය තබාගත නොහැකි බවයි. 

කොටින්ගේ මහ වීර දිනය ලංකාවේත් ලෝකය පුරාත් ඉහළින්ම සැමරුවා.  අපි අතු ගා දැමූ කොටි සංවිධානය යළි නැගිටිලා නම් ඒ බව රටට ඇත්ත කියන්න. නමුත් පැස්බරා ඔළුව වැල්ලේ ගහ ගෙන මම ආරක්ෂිතයි කියලා හිතුවා වගේ හැසිරෙන්න එපා කියලා අපි ආණ්ඩුවෙන් ඉල්ලා සිටිනවා. මොකද එවිට මෙය කැපිය නොහැකි රූස්ස ගසක් වීම නම් කාටවත් වලක්වන්න බෑ.’’යැයි ද ගම්මන්පිල මහතා පැවැසීය.