(නිමල කොඩිතුවක්කු)

රට ගොඩනැගිය හැකි වැඩපිළිවෙළ ඇතුළත් නව ප‍්‍රජාතන්ත‍්‍රවාදී පෙරමුණේ ජනාධිපති අපේක්ෂක සජිත් පේ‍්‍රමදාස මහතාගේ ප‍්‍රතිපත්ති ප‍්‍රකාශය රටේ ඉදිරි හැරවුම් ලක්ෂය වනු ඇතැයි පාර්ලිමේන්තු මන්ත‍්‍රී මනූෂ නානායක්කාර මහතා කොළඹදී අද (31) පැවැසීය.

පොහොට්ටුවේ ජනාධිපති අපේක්ෂක ගෝඨාභය රාජපක්ෂ මහතාගේ ප‍්‍රතිපත්ති ප‍්‍රකාශයට එහා ගිය ජනතාවාදී වැඩපිළිවෙළක්  සජිත් පේ‍්‍රමදාස මහතාගේ ප‍්‍රතිපත්ති ප‍්‍රකාශයෙන් ඉදිරිපත් කර ඇති බවත් පැවසූ මන්ත‍්‍රීවරයා මෙම වැඩපිළිවෙළ තුළින් ඉදිරියේදී රට ප‍්‍රජාතන්ත‍්‍රවාදී සෞභාග්‍යමත් දේශයක් බවට පත් කිරිමට හැකි වෙනු ඇතැයිද  සඳහන් කළේය.

කොළඹ වෝක්ෂෝල් වීදියේ පිහිටි නව ප‍්‍රජාතන්ත‍්‍රවාදී පෙරමුණේ ජනාධිපති අපේක්ෂක සජිත් පේ‍්‍රමදාස මහතාගේ ප‍්‍රධාන මෙහෙයුම් කාර්යාලයේ අද (31) පැවැති මාධ්‍ය හමුවකට එක්වෙමින් ඔහු මේ බව පැවසීය.

එහිදී වැඩිදුරටත් අදහස් දැක්වූ පාර්ලිමේන්තු මන්ත‍්‍රී මනූෂ නානායක්කාර මහතා මෙසේ කීය.

‘‘නව ප‍්‍රජාතන්ත‍්‍රවාදී පෙරමුණේ ජනාධිපති අපේක්ෂක සජිත් පේ‍්‍රමදාස මහතාගේ ප‍්‍රතිපත්ති ප‍්‍රකාශය එළිදක්වනු ලැබූවා. රාජ්‍ය සේවකයාගේ, රණවිරුවන්ගේ වැටුප් වැඩිකරමින් සෑම පුරවැසියකුගේම අයිතිවාසිකම් තහවුරු කරමින් රට සෞභාග්‍යමත් දේශයක් කරා ගෙන යා හැක වැඩපිළිවෙළක් සජිත් පේ‍්‍රමදාස මහතා ඉදිරිපත් කර තිබෙනවා.

ප‍්‍රතිවාදී අපේක්ෂකයාගේ ප‍්‍රතිපත්ති ප‍්‍රකාශයට එහා ගිය රටේ හැරවුම් ලක්ෂය බවට  සජිත් පේ‍්‍රමදාස මහතාගේ ප‍්‍රතිපත්ති ප‍්‍රකාශය පත්ව තිබෙනවා.

බුදුදහමට මුල් තැන දෙමින් අනිකුත් ජාතීන්, ආගම් ආරක්ෂා කරගනිමින් මුළු රටම එක්සේසත් කරන රජයක් අපි බිහිකරනවා. ජාති ආලෙන්, ආගම් ආලෙන් කතා කරන ගෝඨාභය රාජපක්ෂ මහතාගේ ප‍්‍රතිපත්ති  ප‍්‍රකාශයෙන් බුදුදහමට ලබාදී ඇති  තැන පිළිබඳව අපි විමසනවා.

ජාතික ආරක්ෂාව තහවුරු කරමින් රටේ සියලූම ජනතාවට ජීවත් විය හැකි රටක් නිර්මානය කිරිම අපේ අරමුණයි. ඒ වෙනුවෙන් නව නීති හදුන්වා දෙමින් සුරක්ෂිත රටක් වෙනුවෙන් අපි කැපවෙනවා.

පොහොට්ටුවේ අපේක්ෂක ගෝඨාභය රාජපක්ෂ මහතා තවම ශ්‍රී ලංකික පුරවැසියෙක් කියලා ඔප්පු කරලා නැහැ. ඒ සඳහා වන ලිපි ලේඛන ඔහු තවම ඉදිරිපත් කරලා නැහැ. වැරදිලා හරි ගෝඨාභය රාජපක්ෂ මහතා ජනාධිපතිවරණය ජයගත්තත් ගීතා කුමාරසිංහ මහත්මියට වෙච්ච දේම ගෝඨාභය රාජපක්ෂ මහතාට වෙන්න පුලූවන්. මොකද ඔහු ලාංකීය පුරවැසියෙක් නොවන නිසා යැයි ද මන්ත‍්‍රීවරයා එහිදී පැවැසීය.