(හේමලතා ඩී හේවගේ)

පොලිස් විශේෂ කාර්ය බළකායේ නිළධාරියකු ලෙස පෙනී සිට පොලීසිය නොමග යවමින් මහා පරිමාණයෙන් කුඩු බෙදාහරින ‘එස්ටීඑෆ් විකී’ නැමති අනුවර්ත නාමයෙන් හැඳින්වෙන පාතාල සාමාජිකයකු මත්කුඩු සමඟ අද (21) අත් අඩංගුවට ගත්බව ගිරිඋල්ල පොලීසිය පවසයි.    

අත්අඩංගුවට ගත් සැකකරු යක්විල,  බෝගමුව ප්‍රදේශයේ පදිංචි 45 හැවිරිදි විවාහකයකු වන අතර මොහු කාලයක් විශේෂ කාර්ය බළකායේ සේවයේ යෙදී සිට පසුව ඉන් ඉවත්වී ඇමැති ආරක්ෂක අංශයේ සේවය කර තිබේ.

මෙම සැකකරුට 2011 වසරේ මිනීමැරුම් චෝදනාවක් හා 2015 වසරේ වෙඩි තැබීමක් සහ බෝම්බයක් ළඟ තබාගැනීම ඇතුඵ චෝදනා රැසක් සම්බන්ධයෙන් රක්ෂිත බන්ධනාගාරගතව සිට ඇප ලැබූ අයෙක් බව පොලීසිය පවසයි.

කුලියාපිටිය, නාරම්මල, අනුරාධපුරය ඇතුඵ ප්‍රදේශ ගණනාවකට මහා පරිමාණයෙන් කුඩු බෙදාහරින සැකකරු විශේෂකාර්ය බළකායේ, හැඳුනුම්පතේ පිටපතක් පෙන්වමින් පොලීසිය මඟහැර මෙම කාලයක සිට ජාවාරමේ නිරතව ඇති බව පොලීසිය විසින් කරන ලද පරීක්ෂණවලදී  අනාවරණය වී තිබේ.