(පාලිත ආරියවංශ)

ජනාධිපතිවරයා සහ ඇමති සජිත් ප්‍රේමදාස මහතා අතර ඇති ප්‍රේමය දේශපාලන ප්‍රේමයක් යැයි තමා නොසිතන බවත් සජිත් ප්‍රේමදාස මහතාට යම් යම් ක්ෂේත්‍රයන් බාරදුන් පසු කටයුතු කරන ආකාරය පිළිබඳව ඇති වූ අගැයීම හේතුවෙන් මේ ප්‍රේමය ඇති වී ඇතැයි තමා සිතන බවත් ඩිලාන් පෙරේරා මහතා අද (16) බදුල්ලේදී පැවසීය.

ජනාධිපතිවරයා සහ සජිත් ප්‍රේමදාස මහතා අතර ඇති ප්‍රේමය කුමක්දැයි මාධ්‍යවේදීන් විමසූ විට ඩිලාන් පෙරේරා මහතා මේ බව පැවැසීය.

ඩිලාන් පෙරේරා මහතා තවදුරටත් මෙසේද කීය.

‘‘යම්කිසි කෙනෙක් හිතනවානම් දේශපාලන වශයෙන් ‍සජිත් ප්‍රේමදාස  සහ මෛත්‍රීපාල සිරිසේන කියන මේ සුසංයෝගය පිළිබඳව බලාපොරොත්තු තියාගන්න ඒ සිහිනය කවදාවත් සැබෑවෙන්නේ නැහැ .

ගිය වසරේ ඔක්තෝම්බර් මස 26 වෙනිදා මෛත්‍රීපාල සිරිසේන සහ මහින්ද රාජපක්ෂ යන සුසංයෝගය තමයි මේ රටේ ජනතාව ප්‍රාර්ථනා කළේ .

ඒ සුසංයෝගය හරහා බිහිවන අලුත් ජනාධිපතිවරයෙක් හෝ ඉන්න ජනාධිපතිවරයා කියන කාරණය සැබෑවීම තමයි මේ රටේ ජනතාව බලාපොරොත්තු වෙන්නේ.

හැබැයි මහින්ද රාජපක්ෂ මහතාගේ ආශිර්වාදය ඇතිව මෛත්‍රීපාල සිරිසේන මහතාගේ එකඟතාවයෙන් ඇතිවන මහා දේශපාලන ව්‍යාපාරය තුළින් මේ රටේ පාලකයා බිහිවන්නේ.

ඒ නිසා මෛත්‍රී - සජිත් යුගයක්  පිළිබඳව සිහිනය මහ පොළවේ පැල නොවන දේශපාලන යථාර්ථයක්.

බදුල්ල දිස්ත්‍රික්කයේ ශ්‍රී ලංකා නිදහස් පක්ෂයේ සහ පෙහොට්ටුවේ ක්‍රියාකාරීන් පිරිසක් සමඟ මා සාකච්චාවක් පැවැත්වුවා.

ඉදිරි ජනාධිපතිවරණයේදී මහින්ද රාජපක්ෂ මහතා ප්‍රමුඛ ඒ හැදෙන මහා සන්ධානයෙන් ඉදිරිපත් කරන අපේක්ෂකයා   මෛත්‍රීපාල සිරිසේන  හා මහින්ද රාජපක්ෂ ඇතුලු සන්ධානයේ නායකයන් එකතුවෙලා නම් කළාට පස්සේ ඒ අපේක්ෂකයාගේ ජයග්‍රහණය වෙනුවෙන් අපි සියලු දෙනා පෙනී සිටිනවා.

මේ සඳහා එජාපයට විරුද්ධ සියලු පක්ෂ හා සංවිධාන ප්‍රගතිශීලීන් ඒක රාශි කරගෙන යූඑන්පී විරෝධී ව ඉදිරිපත් කරන අපේක්ෂකයා වටා පෙළ ගැහෙනවා.

අපේක්ෂකයා කවුද කියන එකට අපි හොටදාන්න  ඕන නැහැ. ඒකට නායකයෝ ඉන්නවානේ. අපේක්ෂයා කවුද කියන එක තෝරාගන්න මෛත්‍රීපාල සිරිසේන  මහතා, මහින්ද රාජපක්ෂ මහතා, දිනේෂ් ගුණවර්ධන, වාසුදේව නානායක්කාර, විමල් වීරවංශ, ගම්මන්පිළ, තොන්ඩමන්ලා, සුපර් මෑන්ලා, වොන්ඩර්මෑන්ලා යන අය  එකතුවෙලා නම්කරලා දෙයි.

ඒ නම් කරන අපේක්ෂකයා කවුද ඔහු හෝ ඇය වටා කොන්දේසි විරහිතව ඒකරාශි වෙන්න  තීරණය කර තිබෙනවා‘‘ යැයිද ඒ මහතා පැවසීය.