(හර්ෂණ තුෂාර සිල්වා)

අග්‍රාමාත්‍ය රනිල් වික්‍රමසිංහ මහතා ඊයේ (16) පැවැති කැබිනට් මණ්ඩල රැස්වීමට කොළඹ වරාය සම්බන්ධයෙන් කිසිදු කැබිනට් පත්‍රිකාවක් ඉදිරිපත් නොකළ බව රජයේ ආරංචි මාර්ග සඳහන් කරයි.

කොළඹ වරායේ නැගෙනහිර පර්යන්තය සම්බන්ධයෙන් එම රැස්වීමට කැබිනට් පත්‍රිකාවක් ඉදිරිපත් කළේ වරාය සහ නාවික කටයුතු අමාත්‍ය මහින්ද සමරසිංහ මහතා බවද එම ආරංචි මාර්ගවලින් පැවසේ.

වරායේ නැගෙනහිර පර්යන්තය ශ්‍රී ලංකා වරාය අධිකාරිය, ජපානය සහ ඉන්දියාව ඒකාබද්ධව රාජ්‍ය හවුල්කාරීත්ව පදනමක් මත සංවර්ධනය කිරීම සඳහා ඉන්දියාව සහ ශ්‍රී ලංකාව අතර අත්සන් තැබූ එකඟතා ගිවිසුම අවලංගු කර වරාය අධිකාරිය යටතේ පමණක් එම සංවර්ධනය සිදුකිරීම සඳහා අවශ්‍ය මුදල් ප්‍රතිපාදන අනුමත කර දෙන ලෙස මහින්ද සමරසිංහ අමාත්‍යවරයා ඉදිරිපත් කළ කැබිනට් පත්‍රිකාව මගින් ඉල්ලා තිබිණි. 

එහෙත් ඉන්දියාව සහ ශ්‍රී ලංකාව අතර සංවර්ධන ව්‍යාපෘති පිළිබඳව අවබෝධතා ගිවිසුමක් අත්සන් කරන ලද්දේ කැබිනට් අනුමැතිය ඇතිව බව රජයේ ආරංචි මාර්ග කියයි. එම ගිවිසුමට ඉන්දීය පාර්ශවය නියෝජනය කරමින් විදේශ කටයුතු අමාත්‍ය සුෂ්මා ස්වරාජ් මහත්මියද, ශ්‍රී ලංකාව වෙනුවෙන් සංවර්ධන උපාය මාර්ග හා ජාත්‍යන්තර වෙළෙඳ අමාත්‍ය මලික් සමරවික්‍රම මහතාද නවදිල්ලි නුවරදී අත්සන් තැබුවේ පසුගිය වසරේ අප්‍රේල් 25 වැනිදාය.

ඉන්දියාව සමඟ අත්සන් කර තිබෙන එම අවබෝධතා ගිවිසුමට අනුව කොළඹ වරායේ නැගෙනහිර පර්යන්තයේ පළමු අදියර සඳහා අවශ්‍ය බහාලු දොඹකර, ගැන්ටි දොඹකර සහ අනෙකුත් සියලු පහසුකම් ලබාදීමටත් එහි දෙවැනි අදියර සඳහා අවශ්‍ය සියලුම උපකරණ ලබාදීමටත් ජපානය එකඟ වී ඇත.

එලෙස උපකරණ ලබාදීමෙන් පසු හවුල්කාරීත්ව සමාගම ස්ථාපිත කරන බවත් එතෙක් නැගෙනහිර පර්යෙන්තයේ සියලු මෙහෙයුම් කටයුතු ශ්‍රී ලංකා වරාය අධිකරය මගින් සිදුකෙරේ.

අවබෝධතා ගිවිසුම අනුව ශ්‍රී ලංකා වරාය අධිකාරියට කිසිදු මුදල් වැයවීමක් නොමැතිව සියලු පහසුකම් ඉන්දියාවෙන් ලැබෙන අතර හවුල්කාරීත්ව සමාගම පිහිටුවන අවස්ථාව වන විට ඉතා පහසුවෙන් බටහිර වරාය පර්යන්තය පිහිටුවීමේ ශක්තිය ශ්‍රී ලංකා වරාය අධිකාරියට ලැබෙන බව රජයේ ආරංචි මාර්ග සඳහන් කරයි.

වරාය හා නාවික කටයුතු අමාත්‍ය මහින්ද සමරසිංහ මහතාගේ කැබිනට් පත්‍රිකාවේ සඳහන් පරිදි දෙරට අතර ඇතිකරගෙන තිබෙන ගිවිසුම අහෝසි කළහොත් මේ අවස්ථාව මෙරටට අහිමි වනු ඇත.

 නැගෙනහිර පර්යන්තයේ කටයුතුවලින් අනතුරුව ත්‍රිකුණාමලය වරාය සංවර්ධනය කිරීම සඳහා ජපානය එකඟතාව පලකර තිබෙන අතර ඉන්දියාව සමඟ අත්සන් කර තිබෙන ගිවිසුම අහෝසි කළහොත් ඒ අවස්ථාවද ශ්‍රී ලංකාවට අහිමි වනු ඇත.

 ලංකාවෙන් ප්‍රති නැව්ගත කරන බහාලුම් සංඛ්‍යාවෙන් සියයට 80ක්ම ඉන්දියාවේ බහාලුම් වන අතර ගිවිසුම ඒකපාර්ශ්විකව අවලංගු කළහොත් ඉන්දියාව මෙම බහාලුම් වෙනත් ආසියානු වරායක් හරහා ප්‍රති නැව්ගත කිරීමේ අවදානමක්ද මතුවේ. එසේ වුවහොත් කොළඹ වරායේ කටයුතු සම්පූර්ණයෙන්ම පාහේ බිඳ වැටෙනු ඇත.

මේ අනුව ඉන්දියාව සමඟ ගිවිසුමක් අත්සන් කර තිබෙන පසුබිම තුළ ඒකපාර්ශවිකව ඒ ගිවිසුම කඩකිරීම සුදුසු නැති නිසා ඒ පිළිබඳව තම ඉන්දීය සංචාරයේදී ඉන්දීය අග්‍රාමාත්‍ය නරේන්ද්‍ර මෝදි මහතා සමඟ සාකච්ඡා කර එකඟතාවක් ඇති කරගන්නා තුරු මහින්ද සමරසිංහ මහතාගේ කැබිනට් පත්‍රිකාව ගැන තීරණයක් ගැනීම පසුවට කල් තබන ලෙස අග්‍රාමාත්‍ය රනිල් වික්‍රමසිංහ මහතා කැබිනට් මණ්ඩල රැස්වීමේදී ඉල්ලා ඇත. එම ඉල්ලීමට කැබිනට් මණ්ඩලයේ අනුමැතිය හිමිවූ බව  රජයේ ආරංචි මාර්ග කියයි.

අග්‍රාමාත්‍ය රනිල් වික්‍රමසිංහ මහතා ඉන්දියාවේ නිල සංචාරයක් සඳහා හෙට (18) පිටත්ව යන අතර සෙනසුරාදා (20) දක්වා එහි රැඳී සිටිනු ඇත. අග්‍රාමාත්‍ය රනිල් වික්‍රමසිංහ මහතා මෙම සංචාරයේදී ඉන්දීය අග්‍රාමාත්‍ය නරේන්ද්‍ර මෝදි සහ එරට විදේශ කටයුතු ඇමැතිනි සුෂ්මා ස්වරාජ් මහත්මියද හමුවීමට නියමිතය.