(මුදිතා දයානන්ද) 
 
රාජපක්ෂ කඳවුරෙන් ඉදිරිපත් කළ දුර්වලම අපේක්ෂකයා ගෝඨාභය රාජපක්ෂ මහතා බවත්, ඔහු තමන්ට අභියෝගයක් නොවන බවත් ජනතා විමුක්ති පෙරමුණේ ප‍්‍රචාරක ලේකම් පාර්ලිමේන්තු මන්ත‍්‍රී විජිත හේරත් මහතා අද (12) පැවසීය.
 
ජනාධිපතිවරණ  අපේක්ෂකයෙකු සතුවිය යුතු සුදුසුකම් ලෙස මහානායක හිමිවරුන්, කාදිනල්තුමා ඇතුළු ආගමික නායකවරුන් ඉදිරිපත් කර තිබෙන නිර්දේශ කිසිවක් මේ අපේක්ෂයාට නැතැයිද විජිත හේරත් මහතා පැවසීය.
 
ඔහු මෙසේ පැවසූයේ පැලවත්තේ පිහිටි ජනතා විමුක්ති පෙරමුණේ ප‍්‍රධාන කාර්යාලයේදි පැවති මාධ්‍ය හමුවකදී ගෝඨාභය රාජපක්ෂ මහතා ජනාධිපතිවරණයට ඉදිරිපත් වීම ජවිපෙට අභියෝගයක් වියහැකිදැයි මාධ්‍යවේදියෙකු නැගූ ප‍්‍රශ්නයකට පිළිතුරු දෙමිනි. 
 
තවදුරටත් ඔහු මෙසේද පැවසීය.
 
“ගෝඨාභය රාජපක්ෂ කියන්නේ මූල්‍ය විනයක්, පරිපාලනයක් විනයක් නැති තමන්ට හිතෙන පරිදි වැඩකරන නායකයෙක් බව ඉතිහාසයේදි ඔප්පු කර තිබෙනවා. මෙවර ජනාධිපතිවරණයට ඉදිරිපත් වන අපේක්ෂකයා මෙවැනි පුද්ගලයෙක් විය යුතු යැයි දක්වමින් නාපාන පේමසිරි මහානාහිමි ඇතුලූ මහානාහිමිවරු බහුතරයකාගේත්, කාදිනල් මැල්කම් රංජිත් අගරදගුරුතුමන්ගේ හා අනෙකුත් ආගමික නායකයින්ගේ අත්සනින් යුතුව ප‍්‍රකාශනයක් නිකුත් කර තිබෙනවා. එහි සඳහන් වෙනවා නඩුවලින් වැරදිකරුවෙකු හෝ නඩුපවතින හෝ අයෙක් අපේක්ෂකයෙක් ලෙස ඉදිරිපත් කරන්න එපා කියලා. ඒ සුදුසුකමක් මේ අපේක්ෂකයාට නැහැ.

පසුගිය දශක කීපය පුරා මේ රට පාලනය කළ පාලකයින් අපේ ආර්ථිකය දුර්වල කළා. විදේශීය ණය දවසින් දවසම වැඩිකළා. රාජපක්ෂ පාලනය යටතේ බිලියන 7000 කට ආසන්නව පැවති රාජ්‍ය ණය ප‍්‍රමාණය මේ වනවිට බිලියන 12000ට ආසන්න ප‍්‍රමාණයක් දක්වා වැඩිවෙලා. සංස්කෘතිය බිඳ වැට්ටුවා. ජාතික සමගිය බිඳ වැට්ටුවා. ජාතිවාදි ගැටුම් නිර්මාණය කළා. මහජන ආරක්ෂාව දුර්වල කළා. 
 
මේ පාලක කණ්ඩායම් දෙකම එකට තබා පැරදවිය හැකි විකල්ප බලවේගයකට සමාජයේ ඉඩක් තිබෙනවා. සමාජය එවැන්නක් ඉල්ලා සිටිනවා. අපි ජනතා විමුක්ති පෙරමුණ තවත් වාමාංශික පක්ෂ, විද්වත් සංවිධාන, සිවිල් සංවිධානය ඇතුළු පක්ෂ හා සංවිධාන 28 ක් එකතු කරගෙන ජාතික ජනබලවේගය ගොඩනැගුවේ ඒ හිඩැස පිරවීමටයි. 
 
2020 ජනාධිපතිවරණ අපේක්ෂකයා අපි ඉදිරිපත් කරන්නේ මේ ජාතික ජනබලවේගය ලෙසයි. ජාතික ජනබලවේගයේ සියලු සංවිධාන නියෝජිතයන්ගේ එකඟතාවයෙන් දැනටමත් අපේක්ෂකයා තෝරා අවසන්. අපි එය 18වැනිදාට ගාලුමුවදොර පිටියේ පැවැත්වෙන ජන රැළියේදි ඉදිරිපත් කරනවා. ඔහුට මහානායක හිමිවරු ඇතුළු ආගමික නායකයින් ඉදිරිපත් කළ සියලු සුදුසුකම් තිබෙනවා” යැයිද ඒ මහතා පැවසීය.
 
මෙහිදී මාධ්‍යවේදින් නැගු ප‍්‍රශ්නවලට හේරත් මහතා මෙසේ පිළිතුරු දුන්නේය.
 
ප‍්‍රශ්නය - ජාතික ජනබලවේගය ඉදිරිපත් කරන අපේක්ෂකයා දේශපාලනය කරන කෙනෙක්ද?

පිළිතුර - අනිවාර්යයෙන්ම. දේශපාලනය කරන කෙනෙක් මිසක් වෙනත් කෙනෙක් ජනාධිපති වීමට සුදුසු නැහැ. දේශපාලනය කරන ජනතාවගේ ප‍්‍රශ්න වෙනුවෙන් හඬක් නගන, ජනතාව වෙනුවෙන් පෙනී සිටින අයෙක් විය යුතුයි. 

ප‍්‍රශ්නය - මෙවර ජනාධිපතිවරණය තුන්කොන් සටනක් වෙනවා වගේ තමයි පේන්නේ. එහෙම වුණොත් එකම අපේක්ෂකයෙකුටවත50% ගන්න බැහැ නේද? එහෙම වුණොත් නැවත මැතිවරණයක් පවත්වන්න සිදුවෙනවා නේද?

පිළිතුර - නැහැ. එවැනි අවස්ථාවක ක‍්‍රියාකරන ආකාරය ගැන ප‍්‍රතිපාදන මැතිවරණ කොමිසමට තිබෙනවා. දෙවැනි මනාපය ගණන් කිරීම එවැනි එක් ප‍්‍රතිපාදනයක්.