(දිල්රුක්ෂි ග්‍රේරු සහ ටී.කේ.ජී.කපිල)

හිටපු ආරක්ෂක ලේකම් ගෝඨාභය රාජපක්ෂ මහතා පෞද්ගලික සංචාරයකින් පසු අද(12) නැවත ශ්‍රී ලංකාවට පැමිණියේය.
 
ගෝඨාභය රාජපක්ෂ මහතා  ගුවන් තොටුපොලට පැමිණි අවස්ථාවේදි ඔහුට උණුසුම් පිළිගැනීමක් ලැබිණි. මෙම අවස්ථාවට විවිධ මාධ්‍ය ආයතන නියෝජනය කරමින් මාධ්‍යවේදීහු පිරිසක් ද, පාර්ලිමේන්තු මන්ත්‍රීවරුන් ඇතුළු රටේ විවිධ ප්‍රදේශවල සිට පැමිණ සිටි විශාල ජනතාවක් ද ගුවන් තොටුපළ වෙත පැමිණ සිටියහ.
 
පැමිණ සිටි පිරිස හේතුවෙන් ගුවන් තොටුපළ පිටත්වීමේ පර්යන්තයේ මෙන්ම පර්යන්ත ගොඩනැගිල්ලේ මාර්ගයේ ද විශාල තදබදයක් ඇති වී තිබිණි. ගුවන්තොටුපොළ පරිශ්‍රයෙන්  පිටතට යාමට නොහැකිව රාජපක්ෂ මහතාට ⁣මද වේලාවක එහි රැදී සිටීමට ද සිදු විය. තත්වය පාලනය කිරීමට ගුවන් තොටුපළ ආරක්ෂක නිලධාරීහු, ඇමති ආරක්ෂක නිලධාරීහු සහ ගුවන් තොටුපළ පොලීසියේ නිලධාරීහු  කටයුතු කළහ.
 
තමාට එරෙහිව ඇමෙරිකා එක්සත් ජනපදයේ අධිකරණයේ පවරා ඇති නඩුව, ලංකා ආණ්ඩුව සහ ඔවුන්ට හිතවත් මාධ්‍ය විසින් ගොතන ලද බොරුවක් බව හිටපු ආරක්ෂක අමාත්‍යාංශයේ ලේකම් ගෝඨාභය රාජපක්ෂ මහතා එහිදී පැවසීය.

එහිදී වැඩිදුරටත් මාධ්‍ය ඇමතූ ගෝඨාභය රාජපක්ෂ මහතා මෙසේ කීය.
 
“ මම ඇමෙරිකා එක්සත් ජනපදයේ රැදී සිටිය කාළය තුළ, එවැනි අධිකරණ ක්‍රියාවලියක් සම්බන්ධව කිසිදු නීත්‍යානුකූල ලියවිල්ලක් මට භාර දුන්නේ නැහැ. ඇමෙරිකා එක්සත් ජනපද රජය පවා මට එරෙහිව මේ ආකාරයට කටයුතු කරන්නේ නැහැ.
      
පසුගිය වසර හතර හමාරක කාළය තුළ තාඩන, පීඩන, මඩ ගැසීම්, අවලාදවලට මුහුණ දුන්නා  සේ, රටේ අනාගතය වෙනුවෙන් ඉදිරි මාස කීපය තුළදීත් මම ඒවාට මුහුණ දීමට සූදානම්. මේ සියලු සතුරු බලවේග වලට ඉහළින් මගේ දෛවය පවතිනවා.” 

මෙම අවස්ථාවට පාර්ලිමේන්තු මන්ත්‍රීවරුන් වන ඩලස් අලහප්පෙරුම, බන්ධුල ගුණවර්ධන, අරුන්දික ප්‍රනාන්දු,රංජිත් සොයිසා, හිටපු අග්‍ර විනිසුරු සරත් සිල්වා යන මහත්වරුන් ඇතුළු විශාල පිරිසක් ද මෙම අවස්ථාවට පැමිණ සිටියහ.

(ඡායාරූප - ටී.කේ.ජී.කපිල)