(ජයන්ත සමරකෝන්)
 
සෞඛ්‍යාරක්ෂිත බවින් තොරව හෝටල් සහ ආපනශාලා පවත්වාගෙන යාමේ චෝදනාව මත කොළඹ හෝටල් 143කට හා ප්‍රධානපෙළේ ආපනශාලා 55කට එරෙහිව නඩු පැවරූ බව කොළඹ ප්‍රධාන සෞඛ්‍ය වෛද්‍ය නිලධාරී වෛද්‍ය රුවන් විජයමුණි මහතා අද(22) පැවසීය.
 
මෙම හෝටල් සහ ආපනශාලාවල මුළුතැන්ගෙවල්, ශීතකරණ හා අධිශීතකරණ ඉතා අපිරිසිදු තත්ත්වයේ පැවති බවද ඒවායේ මීයන්, කැරපොත්තන් සහ මැසිමදුරුවන් ගැවසෙන බවද ඒ මහතා කීවේය.
 
කොළඹ නගරාධිපතිනී රෝසි සේනානායක මහත්මියගේ උපදෙස් පරිදි කොළඹ නගරය තුළ ඉකුත් 12වනදා සිට ආරම්භ කර ඇති හෝටල් සහ ආපනශාලා පරීක්ෂා කිරීමේ වැඩපිළිවෙළ යටතේ මෙම හෝටල් සහ ආපනශාලා සොයාගත් බවද ඒවා නැවත යථා තත්ත්වයට පත්කරගන්නා තෙක් පරීක්ෂාවෙන් සිටින බවද හෙතෙම සඳහන් කළේය.
 
නගරයේ සෑම සෞඛ්‍ය කොට්ඨාසයක්ම නියෝජනය වන පරිදි ඒ ඒ සෞඛ්‍ය වෛද්‍ය නිලධාරීන්ගේ අධීක්ෂණය යටතේ මහජන සෞඛ්‍ය නිලධාරීන් 50ක් පමණ මෙම සෞඛ්‍ය සේවාවට අනුයුක්ත කර ඇතැයිද නාගරික ජන සෞඛ්‍ය දෙපාර්තමේන්තුව පවසයි.