(මනෝප‍්‍රිය ගුණසේකර)

 

ඩෙල්ෆ් ප‍්‍රාදේශීය සභාවේ සභාපතිවරයාව සිටි ඩැනියෙල් රෙක්සියන් කමලේන්ද්‍රන් මහතාට වෙඩි තබා ඝාතනය කිරීම සම්බන්ධයෙන් ඔහුගේ බිරිඳට සහ උතුරු පළාත් සභාවේ හිටපු විපක්‍ෂ නායකවරයාට එරෙහිව නීතිපතිවරයා විසින් යාපනය මහාධිකරණය හමුවේ අද (18) නඩු පවරන ලදී.

මීට වසර 6කට පෙර සිදුවු මෙම ඝාතනය සුවිශේෂි අපරාධයක් ලෙස සළකනු ලැබීම හේතූවෙන් නීතීපති ජනාධිපති නීතීඥ දප්පුල ද ලිවේරා මහතා ලඝු නොවන මුලික සාක්කි විභාගයකින් තොරවම විත්තිකරුවන්ට එරෙහිව කෙළින්ම මහාධිකරණය හමුවේ නඩු පවරන ලදී.

අපරාධ නඩු විධාන සංග‍්‍රහ පනතේ 03 (1) අ වගන්තිය යටතේ නීතීපතිවරයා මෙම ඉල්ලීම කොට ඇතැයි නීතීපතිවරයාගේ සම්බන්ධීකරණ නිලධාරිණී, ජ්‍යෙෂ්ඨ රජයේ නීතීඥ නිශාරා ජයරත්න මෙනවිය පැවසුවාය.

2013 නොවැම්බර් මස 25 වැනිදා සහ 26 වැනිදා අතර කාලයේදී පුන්කුඩුතිව් ප‍්‍රදේශයේදී ඩැනියෙල් රෙක්සියන් කමලේන්ද්‍රන් මහතා ඝාතනය කිරීමට කුමන්ත‍්‍රණය කළ බවට හා ඩැනියෙල් රෙක්සියන් කමලේන්ද්‍රන් මහතාට වෙඩි තබා ඝාතනය කළ බවට විත්තිකරුවන්ට එරෙහිව නීතීපතිවරයා චෝදනා නඟා ඇත.

මෙලෙස චෝදනා නඟා ඇත්තේ උතුරු පළාත් සභාවේ හිටපු විපක්‍ෂ නායක කන්දසාමි කමලේන්ද්‍රන් හෙවත් කමල් සහ වෙඩි තබා ඝාතනය කළ ඩැනියෙල් රෙක්සියන් කමලේන්ද්‍රන් මහතාගේ බිරිඳ වන රෙක්සින් අනීතා නමැත්තියට එරෙහිවය.