(සුජිත් හේවාජුලිගේ සහ නාලක සංජීව දහනායක)

රටේ අපරාධ , පාතාලය හා මත්ද්‍රව්‍ය පාලනයට දැඩි නීතිරීති හඳුන්වා දෙන්නැයි ජනාධිපති මෛත්‍රීපාල සිරිසේන මහතා අදාළ අංශවලට අද (27) උපදෙස් දුන්නේය.

ජනාධිපතිවරයා මේ උපදෙස් දුන්නේ නීති කෙටුම්පත් සම්පාදන දෙපාර්තමේන්තුවේ නිලධාරීන් පිරිසක් සමඟ ජනාධිපති කාර්යාලයේදී අද (27) පැවැති සාකච්ඡාවකදීය.

මත්ද්‍රව්‍ය වැටලීම් වලට බාධාවන නීතිමය ගැටලු කෙරෙහිද මෙහිදී විශේෂ අවධානය යොමු කෙරුණු අතර නීති විරෝධී මත්පැන් හා මත්ද්‍රව්‍ය ජවාරම්කරුවන් ඉවත් කිරීමටද ජනාධිපතිවරයා මෙහිදී උපදෙස් දුන් බව ජනාධිපති කාර්යාලය පවසයි.

මත්ද්‍රව්‍ය වැරදිවලට අදාළ දඬ මුදල් සංශෝධනය පිළිබඳවද අපරාධ හා වැඩපිළිවෙළ හා එහි නීතිමය සංශෝධන පිළිබඳවද මෙහිදී ජනාධිපතිවරයාගේ අවධානය යොමුවිය

බන්ධනාගාර ක්ෂේත්‍රයේ සිදුවිය යුතු වෙනස්කම් පිළිබඳවද මෙහිදී සාකච්ඡා කෙරිණි.

සුසිල් ප්‍රේමජයන්ත හා ආචාර්ය විජයදාස රාජපක්ෂ යන ඇමැතිවරුද ජනාධිපති ලේකම් උදය ආර් සෙනෙවිරත්න,නීතිඥ ජයන්ත ජයසුරිය,ආරක්ෂක ලේකම් හේමසිරි ප්‍රනාන්දු,පොලිස්පති පූජිත් ජයසුන්දර,අධිකරණ අමාත්‍යාංශයේ ලේකම් ජේ.ජේ රත්නසිරි යන මහත්වරුද නීති කෙටුම්පත් දෙපාර්තමේන්තුවේ නිලධාරිහු පිරිසක්ද මේ සාකච්ඡාවට සහභාගි වූහ.

ඡායාරූප - ජනාධිපති මාධ්‍ය අංශය