(තිළිණි ද සිල්වා)

මහජනතාව අධිකරණ පද්ධතිය කෙරෙහි තබා තිබෙන විශ්වාසය ආරක්ෂා කිරීම විනිසුරුවරුන්ගේ පරම වගකීමක් බව නව අගවිනිසුරු ජයන්ත ජයසූරිය මහතා අද (15) කොළඹ අලුත්කඩේ පිහිටි උපරිමාධිකරණයේ පැවති පිළිගැනීමේ උත්සවයේදී පැවසීය.

ශ්‍රී ලංකාවේ  47 වන අගවිනිසුරුවරයා ලෙස පත්වූ හිටපු නීතිපති ජයන්ත ජයසූරිය මහතා පිළිගැනීමේ චාරිත‍්‍රානුකූල නිල උත්සවය කොළඹ උපරිමාධිකරණ සංකීර්ණයේදී පැවැත්වුණු අතර එහිදී නව අගවිනිසුරුවරයා මේ බව කීය.

එක් විනිසුරුවරයෙකු හෝ එම විශ්වාසය කඩ කරනු ලැබුවහොත් ඉන් සමස්ත අධිකරණ පද්ධතියටම පිරිමැසිය නොහැකි පාඩුවක් සිදුවිය හැකි බවත් වඩා හොඳ නඩු තීන්දු ලබාදීම බියකින් තොරව අපක්ෂපාතීව කටයුතු කිරීමට විනිසුරුවරුන්ද කටයුතු කළ යුතුබවද  ද එහිදී වැඩිදුරටත් අදහස් දක්වමින් නව අගවිනිසුරුවරයා කියා සිටියේය.

එහිදී වැඩිදුරටත් අදහස් දැක්වූ නව අගවිනිසුරු ජයන්ත ජයසූරිය මහතා මෙස්ද කීය.

‘‘මා වෙනුවෙන් මෙවන් උත්කර්ෂවත් උත්සවයක් සංවිධානය කිරීම පිළිබඳව මා ඔබට කෘතඥවෙමි. මට අභිනවයෙන් ලබා දුන් අගවිනිසුරු ධූරය හදවතින්ම පිළිගන්නා සේම එය මාතෘභූමියට සේවය කිරීමේ අවස්ථාවක් කර ගන්නවා. නීතිපති වශයෙන් මා සේවය කළ පසුගිය තෙවසරක කාලය තුළ අගවිනිසුරුවරුන් දෙදෙනෙකු සහ ශ්‍රේෂ්ඨාධිකරණ විනිසුරුවරුන් අටදෙනෙකු යටතේ රටට සේවය කිරීමට හැකිවීම මහත් භාග්‍ය සේ සලකමි.

මහජනතාව අධිකරණ පද්ධතිය කෙරෙහි තබා තිබෙන විශ්වාසය ආරක්ෂා කිරීම විනිසුරුවරුන්ගේ පරම වගකීමක් බව මා දැඩිව විශ්වාස කරනවා.එක් විනිසුරුවරයෙකු හෝ එම විශ්වාසය කඩ කරනු ලැබුවහොත් ඉන් සමස්ත අධිකරණ පද්ධතියටම පිරිමැසිය නොහැකි පාඩුවක් සිදුවිය හැකියි.

සක‍්‍රීය සහ බලාත්මක අධිකරණ පද්ධතියක් ඇති කිරීමට නම් අධිකරණය කෙරෙහි ඇති ජනතා විශ්වාසය සහ ගරුත්වය අත්‍යවශ්‍ය සාධකයක් වනවා.එම ගරුත්වය සහ විශ්වාසය ඇති කරලීම සඳහා වඩා හොඳ නඩු තීන්දු ලබාදීමට බියකින් තොරව අපක්ෂපාතීව කටයුතු කිරීමට විනිසුරුවරුන්ද කටයුතු කළ යුතුයි.

විනිසුරුවරුන් විවෘත මනසකින් කටයුතු කළ යුතු අතර හොඳින් ඇහුම්කන් දීම සිදුකළ යුතුයි.එමෙන්ම අධිකරණ කටයුතුවල දී බියකින් තොරව අපක්ෂපාතී අයුරින් සිය රාජකාරිය ඉටුකිරීම විනිසුරුවරුන්ගේ ප‍්‍රමුඛ වගකීමක්.එක් විනිසුරුවරුවරයෙකු හෝ එම විශ්වාසය කඩ කරනු ලැබුවහොත් ඉන් සමස්ත අධිකරණ පද්ධතියටම පිරිමැසිය නොහැකි පාඩුවක් සිදුවිය හැකි හැකියි.

සිය රාජකාරී කටයුතු කිරීමේදී විනිසුරුවරුන් විවෘත මනසකින් සහ බියකින් තොරව අපක්ෂපාතීව කටයුතු කිරීම අත්‍යවශ්‍යයයි.නීතිය හා සාමය මත පවතින ප‍්‍රජාතන්ත‍්‍රවාදය සුරක්ෂිත කිරීම සඳහා එය ඉතාම වැදගත් වනවා. සමාජයක යහපැවැත්මට නිදහස සාමය , නීතිය සහ යහපාලනය අත්‍යවශ්‍ය  සාධකයි.

අප විසින් පුද්ගලිකව අත්පත් කරගත් දේ ගැන සතුටුවන ගමන්ම එය සමාජයේ සුබ සිද්ධිය සඳහා යෙදවීමේ ක‍්‍රියාවලිය ඉතා වැදගත් කාරනයක්.ඒ තුළින් සමාජයේ වරප‍්‍රසාද හිමි විය යුතු අයට ප‍්‍රතිලාභ සැලසෙන ක‍්‍රමයක් ඇති කළ යුතුයි.

අවංක ප‍්‍රයත්නයක් හා ශක්තිමත් ක‍්‍රියාදාමයකින් විනිසුරුවරුන් සහ නීතීඥවරුන්ට වෙනසකට මඟපෑදිය හැකියි.ඒ වෙනස තුළින් ප‍්‍රතිලාභ හිමිවිය යුතු සමාජයේ සියලු දෙනාට යහපතක් සැලසෙන බව මා විශ්වාස කරනවා.

ඒ වගේම මා මගේ රාජකාරිය පිළිබඳව, එහි ස්වභාවය , එහි ඇති වගකීම පිළිබඳ ගැන ඉතාම හොඳින් දන්නවා. නීතිපති දෙපාර්තමේන්තුවේ වසර 35ක අඛණ්ඩ සේවය මට ඉතාම පිටුවහලක් වූ බව සඳහන් කළ යුතුමයි. අගවිනිසුරු ධූරයට පත් හයවැනි නීතිපතිවරයා වන්නට තරම් මා වාසනාවන්ත වූවා. ඒ වගේම අගවිනිසුරු ධූරයට පත් කිරීම කෙරෙහි විශ්වාසය තැබූ සියලූ දෙනාටමත් , මා සේවය කළ නීතිපති දෙපාර්තමේන්තුවටත් ම ස්තූති කිරීමට මෙය අවස්ථාවක් කර ගන්නවා. අධිකරණ සේවාවට මහේස්ත‍්‍රාත්වරයෙකු ලෙස සේවයට එක් වූවෙකුට මෙවැනි අවස්ථාවක් ලබා දීම ගැන ජනාධිපතිවරයා වෙත මගේ ස්තූතිවන්ත වෙනවා.

ඒ වගේම මේ ගමනට මා හට අත්වැලක් වූ තැනැත්තන්ට මගේ ස්තූතිය පුද කිරීමට මා මෙය අවස්ථාවක් කර ගන්නවා. මා අධ්‍යාපනය ලැබූ කුරුණෑගල මලියදේව විදුහල සහ එහි විදුහල්පතිවරුන්ට හා ආචාර්ය මණ්ඩලයට, මා නීතී අධ්‍යාපනය ලැබූ ශ්‍රී ලංකා නීති විද්‍යාලය  නැසීගිය විනිසුරු පී.රාමනාදන්, ජනාධිපති නීතීඥ දයා පෙරේරා, ජනාධිපති නීතීඥ ආරිය රැකව  යන මහත්වරුන්ට ඇතුළු අතහිත දුන් සියලු දෙනාට මාගේ කෘතඥතාව පිරි නැමේ. මගේ දෙමව්පියන්ට, මගේ සහෝදර සහහෝදරයින් හත් දෙනාට, මාගේ භාර්යාවට, ඇයගේ පවුලේ උදවිය සහ අප දෙදෙනාගේ ආදරණීය දරුවන් දෙදෙනාට, ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ට හා කාර්ය මණ්ඩලයට මාගේ හෘදයාංගම ස්තූතිය පිරිනමන්නේ යැයිද, අගවිනිසුරු ජයන්ත ජයසූරිය මහතා කියා සිටියේය.

උපරිමාධිකරණයේ විශේෂ අධිකරණ ශාලාවේ පැවති මෙම නව අගවිනිසුරු පිළිගැනීමේ උත්සවයයේ අගවිනිසුරුවරයා පිළිගනිමින් නීතිපති හා ජනාධිපති නීතිඥ දප්පුල ද ලිවේරා සහ ශ‍්‍රී ලංකා නීතිඥ සංගමයේ සභාපති ජනාධිපති නීතිඥ කාලිංග ඉන්දතිස්ස යන මහත්වරු කතා පැවැත්වූහ.

මෙම පිළිගැනීමේ චාරිත‍්‍රානුකූල උත්සවය සඳහා ශ්‍රේෂ්ඨාධිකරණය, අභියාචනාධිකරණය, කොළඹ මහාධිකරණය, කොළඹ සිවිල් අභියාචනා මහාධිකරණය, කොළඹ වාණිජ මහාධිකරණය සහ කොළඹ මහේස්ත‍්‍රාත් අධිකරණය මෙන්ම කොළඹ දිසා අධිකරණය නියෝජනය කරන සියලුම විනිසුරුවරු සහභාගි වී සිටියහ.