(දයාසීලි ලියනගේ සහ උපුල් වික්‍රමසිංහ)   
මුදල් ඇමැති මංගල සමරවීර මහතා පසුගිය බ්‍රහස්පතින්දා පාර්ලිමේන්තුවට ඉදිරිපත් කළ අයවැය යෝජනාවලිය යටතේ යෝජනා කළ දුරකථන කුළුණු සඳහා අය කරන බද්ධ මගින් ජංගම දුරකථන ගාස්තු වැඩිවනු ඇතැයි වාර්තාවේ. 

දුරකථන කුලුණු සඳහා මසකට රුපියල් ලක්ෂ දෙක බැගින් වූ මුදලක් අය කිරීමට ඉදිරිපත් කරන ලද යෝජනාවට අනුව එම සමාගම් අදාළ බදු මුදල පාරිභෝගිකයා මත පටවනු ඇතැයිද ඒ අනුව ගාස්තු වැඩි කිරීමට දුරකථන සමාගම්වලට සිදුවනු ඇතැයිද විශ්වාස කෙරේ. 

දුරකථන සමාගම් සතුව දුරකථන කුලුණු 11192ක් රටපුරා ඉදිකර තිබෙන අතර මෙම යෝජනාවට අනුව මේවා සඳහා මසකට රුපියල් දෙසිය විසිතුන් කෝටි අසූහතර ලක්ෂයක (2238,40,0000) මුදලක් ගෙවීමට සිදුවනු ඇත. 

ඒ අනුව වසරකට රුපියල් දෙදහස් අසූහය කෝටි අසූ ලක්ෂයක (26860,80,0000) බදු මුදලක් ගෙවීමට දුරකථන ආයතනවලට සිදුවෙයි. 

මේ සම්බන්ධයෙන් ඒකාබද්ධ විපක්ෂයේ ආර්ථික පර්යේෂණ ඒකකයේ ප්‍රධානී පාර්ලිමේන්තු මන්ත්‍රී බන්දුල ගුණවර්ධන මහතාගෙන් කළ විමසීමේදී ඒ මහතා ප්‍රකාශ කළේ මෙම බදු යෝජනාවට අනුව අනිවාර්යයෙන්ම ජංගම දුරකථන ගාස්තු විශාල වශයෙන් වැඩිවීමක් සිදුවන බවයි. 

පාඩු ලබමින් ආයතන පවත්වාගෙන යාමේ ක්‍රමවේදයක් නොමැති නිසා රජයෙන් අයකරන බදු පාරිභෝගිකයාගෙන් අයකර ගැනීමට ඔවුන්ට සිදුවන බවද ඔහු කීය. 

සැර මත්පැන් බදු වැඩි කිරීමට ගෙන ඇති තීරණයට අනුව මත්පැන් බෝතලයක මිල දළ වශයෙන් රුපියල් 300කින් වත් වැඩිවනු ඇතැයි විශ්වාස කෙරේ. ඒ අනුව රුපියල් 1300ක් වන බෝතලයක් 1600ක් වනු ඇතැයි විශ්වාස කෙරේ. ජාතිය ගලවා ගැනීමේ බද්ද, මත්පැන් නිෂ්පාදනයට ගත්තු මොලැසස් සඳහා වන බද්ද, සැර මත බදු අය කිරීමේ සූත්‍රය සඳහා වන බද්ද ආදිය එකතුවන විට මත්පැන් බෝතලයක මිල රුපියල් 300 කින්වත් වැඩිවනු ඇතැයි අපේක්ෂිතය. 

බියර් බදු අඩු කිරීමට ගන්නා ලද තීරණයට අනුව සම්මත සැර සියයට 5ට අඩු බියර් කෑන් එකක මිල රුපියල් 350 සිට 300 දක්වා අඩුවීමට බොහෝදුරට ඉඩ ඇති බව විශ්වාස කෙරේ. සම්මත සැර සියයට 5ට වැඩි බියර් කෑන් එකක මිල රුපියල් 240 සිට 190 දක්වා අඩු වෙතැයි සඳහන්වේ. 

වාහන බදු 
වාහන සඳහා කාබන් බද්දක් හඳුන්වාදී ඇති අතර මෙම බද්ද දිනක පදනම යටතේ අය කිරීමට නියමිතය. 
යතුරු පැදි, මෝටර් රථ සහ මගී බස් රථ සඳහා අනුපිළිවෙලින් දිනකට ශත 17ක්, රුපියල් 1.78ක් 
සහ රුපියල් 2.74ක් වශයෙන් කාබන් බද්ද පැනවේ.

සුඛෝපභෝගී වාහන සඳහා අය කෙරෙන බද්ද රුපියල් ලක්ෂ 25කින් වැඩි කෙරේ. 
පරිප්පු, කරවල, හාල්මැස්සන් ඇතුළු අත්‍යවශ්‍ය පාරිභෝගික භාණ්ඩ රැසක් මත පනවා තිබූ වෙළෙඳ භාණ්ඩ බද්ද අඩු කිරීමට මුදල් අමාත්‍යාංශය ගත් තීරණය අනුව එම ද්‍රව්‍යවල මිල ගණන් ඉදිරි දින කීපයේදී අඩුවනු ඇතැයි වෙළෙඳපොළ ආරංචි මාර්ග සඳහන් කරයි. 

මුදල් අමාත්‍යාංශය නිකුත් කළ ගැසට් නිවේදනයෙහි සඳහන් ආහාර ද්‍රව්‍ය අතරින් වෙළෙඳ පොළේ දැනට රුපියල් 160 ක මුදලකට අලෙවි වෙන රතු පරිප්පු කිලෝවක මිල රුපියල් 12කින්ද, රුපියල් 800 ක මිලකට අලෙවි වන හාල්මැස්සන් කිලෝවක මිල රුපියල් 10කින්ද රුපියල් 240ත් 260ත් අතර මිලකට අලෙවි වන ලොකු ලූනු කිලෝවක මිල රුපියල් 39කින්ද, රුපියල් 700ත් 800ත් අතර මුදලකට අලෙවි වන කරවල කිලෝවක මිල රුපියල් 50කින්ද, රුපියල් 200ත් 240ත් අතර මිලකට අලෙවි වෙන අර්තාපල් කිලෝව රුපියල් 39 කින්ද, රුපියල් 320ත් 340ත් අතර මිලකට අලෙවි වෙන පොල්තෙල් ලීටරයක මිල රුපියල් 15කින්ද අඩුවෙනු ඇතැයි පාරිභෝගික අයිතීන් සුරැකීමේ ජාතික සංවිධානය පවසයි. 

එම සංවිධානයේ සභාපති රංජිත් විතානගේ මහතා ඉරිදා ලංකාදීපයට කීවේ මේ ආකාරයට අත්‍යවශ්‍ය වෙළෙඳ භාණ්ඩ කීපයක මිල අඩු කිරීමට පියවර ගැනීම යහපත් තත්ත්වයක් වුවත් එසේ මිල අඩු කළ ද්‍රව්‍යවලට පාලන මිලක් නියම කර වැඩි මිලට ඒවා අලෙවි කරන වෙළෙඳසැල් වැටලීමට පාරිභෝගික කටයුතු අධිකාරිය කටයුතු නොකරන තුරු එය ප්‍රතිඵලදායක නොවන බවය.