(ටෝනි කරුණානායක)

සංවිධානාත්මක අපරාධ කණ්ඩායම් නායක ගනේමුල්ලේ සංජීව නැමැති පාතාල නායකයාගේ ප්‍රධාන  ගෝලයකු යැයි කියන ගම්පහ උඩුගම්පොළ අලයා යන නමින් අනුවර්තන නාමයෙන් හදුන්වනු ලබන සැකකරුව ලබන 13 වෙනිදා දක්වා (දින07ක්)පෑලියගොඩ කොට්ඨාසයේ විශේෂ මෙහෙයුම් ඒකකයේ රඳවා ප්‍රශ්න කිරීම සඳහා ගම්පහ අතිරේක මහෙස්ත්‍රාත් ආර් .එස්.එම්.මහේන්ද්‍ර රාජා මහතා අද (06)අවසර ලබා දුන්නේය .

ජේෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා ට ලැබුණු තොරතුරක් මත බස්නාහිර උතුර අපරාධ විමර්ශන කොට්ඨාසයේ ප්‍රධාන පොලිස් පරීක්ෂක ජයන්ත ධර්මකීර්ති, පොලිස් පරීක්ෂක අජිත් සේනානායක, උප පොලිස් පරීක්ෂක කපුරු බණ්ඩාර ඇතුළු නිලධාරීන් කණ්ඩායමක් සැකකරුව ගම්පහ උඩුගම්පොළ ප්‍රදේශයේ ( 05 )වෙනිදා සවස  හෙරොයින් ග්‍රෑම්  10 ක් සමග අත් අඩංගුවට ගන්නා ලදී.

සැකකරු ගම්පහ ඇතුළු අවට ප්‍රදේශවල දී කළ මිනිස් ඝාතන, කප්පම් ගැනීම් සහ හෙරොයින් ජාවාරම් සම්බන්ධයෙන් වැඩිදුර විමර්ශනය කිරීම සඳහා සැකකරුව රඳවා විමර්ශනය කිරීමට අවසර ලබා දෙන ලෙස පොලීසිය අධිකරණය හමුවේ අද ඉල්ලා සිටියේ ය.

එම ඉල්ලීමට ඉඩ දුන් මහෙස්ත්‍රාත්වරයා පරීක්ෂණ අවසන් වූ වහාම සැකකරුව ගම්පහ මහේස්ත්‍රාත් අධිකරණයට ඉදිරිපත් කරන ලෙසට පොලිසියට වැඩිදුරටත් නියම කළේය.