(නිමල කොඩිතුවක්කු)

නුවරඑළිය දිස්ත‍්‍රික්කයේ ප‍්‍රදේශීය සභා පහ දොළහ දක්වා වැඩි කර එම ප‍්‍රදේශවල ජනතාවට සාධාරණය ඉටු කර ප‍්‍රජාතන්ත‍්‍රවාදය ශක්තිමත් කරන ලෙසට තමන් රජයට අවධාරණය කරන බව  රාජ්‍ය භාෂා හා ජාතික සංවාද අමාත්‍ය මනෝ ගනේෂන් මහතා අද (16) පැවසීය.

අඹගමුව සහ නුවරඑළිය යන ප‍්‍රදේශීය සභා වල දෙලක්ෂ පනස් දහසකට අධික ජනතාවක් ජීවත් වන බවත් සීමා නීර්ණ කටයුතු වළදි එම ජනතාවට බලවත් අසාධාරණයක් සිදුව ඇති බවත් අමාත්‍යවරයා සදහන් කළේය.

දමිළ ප‍්‍රගතිශීලී සන්ධානය විසින් කදුරට නව ගම්මාන යටිතල පහසුකම් හා ප‍්‍රජා සංවර්ධන අමාත්‍යාංශයේ කැඳවු මාධ්‍ය හමුවකට එක්වෙමින් අමාත්‍යවරයා මේ බව පැවසීය.  

'පළාත් පාලන විෂයභාර ඇමැති ෆයිසර් මුස්තාෆා මහතා මහින්ද දේශප‍්‍රිය මහතාට සම්ප‍්‍රදානුකුලව භාරදුන්නා ප‍්‍රදේශීය සභා, නගර සභා පනත. එතුමා සඳහන් කළා හෙට අනිද්දා එය ගැසට් කරනවා කියලා. අපි කියනවා බොහොම හොඳයි. නමුත් ආණ්ඩුව අපිට පොරොන්දුවක් දීලා තියෙනවා නුවරඑළිය දිස්ත‍්‍රික්කයේ තිබෙන ප‍්‍රදේශීය සභාවල සංඛ්‍යාව වැඩි කරන්නම් කියන පොරනේදුව. අඹගමුව, නුවර එළිය ප‍්‍රදේශීය සභාවලට යන්න ඇතැම් ජනතාවකට කිලෝමීටර් 65ක් ගමන් කළ යුතුයි මේ දේවල් නිවැරදි කළ යුතුයි. ඒ අයටත් සාධාරණය ලබා දිය යුතුයි. නුවර එළියේ ප‍්‍රදේශීය සභා 5ක් තියෙනවා. නගර සභා 2ක් තියෙනවා. මහ නගර සභාවක් තියෙනවා. අපි කියන්නේ මේ ප‍්‍රදේශීය සභා පහ දොළහ දක්වා වැඩි කළ යුතුයි' බව ඇමැතිවරයා ප්‍රකාශ කළේය.