(දිලීප් ජයසේකර සහ චන්ද්‍රසේන ගමගේ)
 
හම්බන්තොට සෙල්ලම් පිස්තෝල නඩුව අද(18) හම්බන්තොට මහාධිකරණය හමුවේ කැඳවූ අවස්ථාවේ අධි චෝදනා පත්‍රයේ සඳහන් කර ඇති  සාක්ෂිකරුවෙකුගේ නමක් සාක්ෂි ලබාදීමේදි වැරදි ලෙස සටහන් වී තිබී සහ එය නැවත සංශෝධනය කිරීම හේතුවෙන් හම්බන්තොට මහාධිකරණ විනිසුරු තාමර තෙන්නකෝන් මහතා නඩුවේ තීන්දුව ප්‍රකාශයට පත්කිරීම අගෝස්තු 2 දින දක්වා කල් තැබුවේය.
 
2014.04.17 වන දින මත්තල ගුවන්තොටුපල හා හම්බන්තොට වරායේ නිරීක්ෂණ චාරිකාවක යෙදුණු එක්සත් ජාතික පක්ෂ පාර්ලිමේන්තු මන්ත්‍රී පිරිසක් වූ එරාන් වික්‍රමරත්න, අජිත් මාන්නප්පෙරුම, අජිත් පී. පෙරේරා, ආර්. යෝගරාජන් ඇතුළු පිරිසකට එල්ල වූ මැර ප්‍රහාරය සම්බන්ධයෙන් හම්බන්තොට නගරාධිපති එරාජ් රවින්ද්‍ර ප්‍රනාන්දු ඇතුළු සැකකරුවන් පස්දෙනෙකුට විරුද්ධව හම්බන්තොට මහාධිකරණය හමුවේ නීතිපතිවරයා විසින් අධිචෝදන පත්‍ර ගොනු කර තිබුණි.
 
ඒ අනුව වසර 5ක පමණ කාලයක් නඩුව විභාග කෙරුණු අතර එහි තීන්දුව ප්‍රකාශ කිරීම සඳහා නඩුව අද(18) හම්බන්තොට මහාධිකරණයේදී කැඳවිණි. එහිදී නියෝජ්‍ය සොලිසිටර් ‍ජෙනරාල් දිලිප පීරිස් මහතා මහතා විසින් අධි චෝදනා පත්‍රයේ සඳහන් සාක්ෂි ලැයිස්තුවේ සටහන්ව තිබූ නමක් සාක්ෂි ලබාදීමේදි වැරදි ලෙස සටහන් වී තිබීම හේතුවෙන් එය සංශෝධනයට ලක් කෙරුණි. අදාළ සංශෝධනයෙන් පසු නඩුවේ තීන්දුව ප්‍රකාශයට පත් කිරීම අගෝස්තු 2 දක්වා කල් තැබීමට මහාධිකරණ විනිසුරු තාමර තෙන්නකෝන් මහතා පියවර ගත්තේය.
 
හම්බන්තොට නගරාධිපති එරාජ් රවීන්ද්‍ර ප්‍රනාන්දු ඇතුළු විත්තිකරුවන් 5 දෙනා වෙනුවෙන් ජනාධිපති නිතීඥ යු.ආර් ද සිල්වා මහතාගේ උපදෙස් පරිදි නීතීඥ තුසිත අළුත්පටබැදිගේ, නීතීඥ දේවින්ද රණවක ඇතුළු නීතීඥවරුන් පිරිසක් පෙනී සිටි අතර පැමිණිල්ල වෙනුවෙන් නියෝජ්‍ය සොලිසිටර් ජෙනරාල් දිලිප පීරිස් මහතා සහ රජයේ අධිනීතීඥ ගයාන් පෙරේරා මහතා පෙනී සිටියහ.