(ද හින්දු ඇසුරිනි - 125)

ඉන්දියාවේ ආන්ද්‍රාප්‍රදේශ් ප්‍රාන්තයේ  විශාඛාපට්නම් නගරයේ  සිදුවු රිය අනතුරකින් ලොරියක ගමන් ගත්  ශ්‍රී ලාංකික තරුණයෙකු බරපතල තුවාල ලබා මියගොස් ඇතැයි ද හින්දු පුවත්පත වාර්තා කරයි. මෙලෙස මිය ගොස් ඇත්තේ සුබ්‍රමනියම් ගනේෂ් නැමැති විසි හය හැවිරිදි පුද්ගලයෙකි. 

මොහු රිය අනතුර සිදුවූ ස්ථානයේදීම ජීවිතක්ෂයට පත්ව ඇත.ඔහු කාලයක පටන් එම ප්‍ර දේශයේ පදිංචිව සිටි අයෙකු බැව් පැවසේ. මෙම ලාංකිකයා සමඟ අදාළ ලොරි රථයේ ගමන්ගත් තවත් ඉන්දීය ජාතිකයින්  තිදෙනෙකු රිය අනතුරෙන් මියගොස් තිබේ.

ලාංකිකයා ඇතුළු සිව්දෙනා ගමන්ගත් සිමෙන්ති පැටවූ ලොරි රථයක් වංගු සහිත ප්‍රදේශයකදී රියදුරුට පාලනය කරගත නොහැකිවීමෙන් මාර්ගයේ අසල පිහිටි වෙළඳ සලක හැප්පීමෙන් පසුව එම රථය පෙරළි ගොස් අනතුරට ලක්ව ඇති බවද සඳහන්ය.
අනතුරෙන් පසුව ලොරි රථයේ රියදුරුට තුවාල සිදුවී නොමැති අතර ඔහු වහා එම ස්ථානයෙන් පළාගොස් ඇතැයි සඳහන් වේ. මෙම රිය අනතුරෙන් ශ්‍රී ලාංකිකයා ඇතුළු පුද්ගලයින් සිව් දෙනෙකු එම ස්ථානයේදීම මියගොස් තිබේ. තවත් තිදෙනෙකු එම අනතුරෙන්  තුවාල ලබා රෝහල් ගත කර තිබේ.