(රොමේෂ් මධුෂංඛ)

පුලියන්කුලම් මරතෝඩි ප්‍රදේශයේ රක්ෂිත කැලෑවක පුරාවිද්‍යා ස්ථානයක නිධානයක් ගොඩගනිමින් සිටි සැකකරුවන් සිව් දෙනෙකු පෞරාණික බුදු පිළිම ඇතුළු භාණ්ඩ රැසක් සමඟ අත්අඩංගුවට ගත් බව පුලියන්කුලම් පොලිසිය පැවසයි.

මෙම සැකකරුවන් බැකෝ යන්ත්‍රයක් දමා නිධානය ගොඩ ගැනීම සිදු කොට ඇති අතර ඒ පිළිබඳ පුලියන්කුලම් පොලිසියට ලැබුණු තොරතුරකට අනුව පොලිස් නිලධාරීන් පිරිසක් එම ස්ථානයට ලඟා වන විට නිධානය හෑරු පුද්ගලයින් නිධානය ගැනීමට හෑරු වල වසමින් සිට ඇති අතර එම අවස්ථාවේදී ප්‍රදේශය වටලා සැකකරුවන් සිවු දෙනෙකු අත්අඩංගුවට ගෙන ඇත.

එහිදී නිධානය හෑරු සැකකරුවන් ලඟ තිබී අඟල් 09 ක් උස කිරිගරුඩ බුද්ධ ප්‍රතිමාවක්, අනුරාධපුර යුගයට අයත් අඟල් 19ක් ලොකු පුරාතන මැටි පහණක්, මැටියෙන් සාදන ලද මෙතෙක් හඳුනානොගත් බෝලයක් වැනි දෙයක්, කොතක කොටස් දෙකක් , බැකෝ යන්ත්‍රයක්, ත්‍රී රෝද රථයක්, හා නිධානය ලබා ගැනීමට යොදා ගත් උපකරණ හා ද්‍රව්‍ය තොගයක්ද සොයා ගෙන ඇත.

අත්අඩංගුවට ගත් සැකකරුවන් මඩකලපුව, පුලියන්කුලම, ත්‍රීකුණාමලය, තලවකැලේ යන ප්‍රදේශයන්හි පදිංචිකරුවන් වන අතර ඔවුන් වවුනියාව අධිකරණයට ඉදිරිපත් කිරීමට පියවර ගෙන ඇති බවද පරීක්ෂණ සිදු කරන පුලියන්කුලම් පොලිසිය පවසයි.