( තිළිණි ද සිල්වා)

දිවයිනට ගෙන ඒමට නියමිත ඊළඟ කොවිඩ් එන්නත් තොගයෙන් සංචාරක ක්ෂේත්‍රයේ සහ කර්මාන්තශාලා සේවක සේවිකාවන්ට ප්‍රමුඛතාවය ලබා දීමට ජනාධිපති ගෝඨාභය රාජපක්ෂ මහතා එකඟත්වය පළ කළ බව සංචාරක අමාත්‍ය  ප්‍රසන්න රණතුංග මහතා පැවසීය.

ඒ අනුව මේ මස අග වන විට සංචාරක ක්ෂේත්‍ර යේ නියුතුවූවන්ට හා දිවයිනේ සියළු කර්මාන්තශාලා සේවක සේවිකාවන්ට කොවිඩ් එනන්ත ලබා දී අවසන් කිරීමට හැකිවනු ඇති බවට ද ඇමැතිවරයා විශ්වාසය පළ කරයි.

සංචාරක සංවර්ධන අධිකාරියේ ලියාපදිංචි හෝටල් සේවකයන්, සංචාරක මඟ පෙන්වන්නන්, රියදුරන් ඇතුළු 20,000 කට ආසන්න පිරිසකගේ නාම ලේඛන මේ වන විට සෞඛ්‍ය අමාත්‍යාංශ වෙත යොමු කර ඇතැයිද ඇමැතිවරයා මෙහි දී සදහන් කළේය.

ඊට අමතරව  සංචාරක ක්ෂේත්‍රයේ නියුතු සෙසු පිරිස් වලට ද එන්නත ලබා දීම සදහා පියවර ගනිමින් සිටින බව ද ඇමැතිවරයා කීවේය.

දිවයින පුරා ආයෝජන මණ්ඩලයට අයත් නිදහස් වෙළද කළාප 14 තුළ පමණක් කර්මාන්තශාලා 250 කට සේවය කරනු ලබන සේවක සේවිකාවන් ගණන 130,000 ඉක්මවන අතර ඔවුන් ද ඇතුළත්ව දිවයින පුරා කර්මාන්තශාලා 1700 කට වැඩි සංඛ්‍යාවක සේවය කරන සේවක සේවිකාවන්ට මේ යටතේ කොවිඩ් එන්නත ලබා දීම ඉදිරියේ දී සිදු කිරීමට අපේක්ෂා කරන බවද ඇමැතිවරයා මෙහි දී සදහන් කළේය.

සංචාරකයන් මෙරටට ගෙන්වීමේ වැඩපිළිවෙලේ ප්‍රගතිය පිළිබද සාකච්ඡා කිරීම සදහා සංචාරක අමාත්‍යාංශයේ පැවති විශේෂ සාකච්ඡාවක දී ඇමැතිවරයා මේ බව සදහන් කළේය.

සංචාරක සංවිධාන කරනු ලබන ආයතන වල නියෝජිතයන් මේ වන විට සංචාරකයන් දිවයිනට ගෙන්වීමේ දී මුහුණ පෑමට සිදුව ඇති ගැටළු කීපයක් පිළිබදව ද ඇමැතිවරයාගේ අවධානය යොමු කළේය.

විශේෂයෙන් ම මෙරටට සංචාරකයන් වැඩි වශයෙන් පැමිණි විදෙස් රටවල් රැසක් තවමත් සිය ජනතාවට සංචාරය සදහා අවසර ලබා නොදීම මෙන්ම මෙරටට පැමිණීමට අපේක්ෂා කරන සංචාරකයන්ට වීසා ලබා ගැනීමේ දි ඇති වන දුෂ්කරතා සම්බන්ධයෙන් ද මෙහි දී අවධානය යොමු කෙරිණි.

ආගමන විගමන දෙපාර්තුමේන්තුව සමග සාකච්ඡා කර එම ගැටළුවට කඩිනමින් විසදුම් ලබා දෙන බව ද ඇමැතිවරයා කීවේය. ඊට අමතරව සංචාරකයන් ගෙන්වීමේ දී ඇති සීමා පිළිබද ව ද දීර්ඝ ලෙස සාකච්ඡා කෙරිණි. මේ පිළිබද ව කොවිඩ් කමිටුවේ හා සෞඛ්‍ය බළධාරින්ගේ අවධානය යොමු කිරීමට ද මෙහි දී තීරණය කෙරිණි.