( තිළිණි ද සිල්වා සහ රංජන් කටුගම්පොළ  )
 
බුද්ධි තොරතුරු ලැබී තිබියදී පාස්කු ඉරිදා දින කිතුණු දේවස්ථාන හා සංචාරක හෝටල්වලට එල්ල වූ ත්‍රස්ත ප්‍රහාරය වළක්වා ගැනීමට නොහැකි වීම තුළින් හිටපු ආරක්ෂක ලේකම්වරයා සහ පොලිස්පතිවරයා මහජනතාවගේ මූලික අයිතීන් කඩ කර ඇති බවට චෝදනා කරමින් එම ප්‍රහාරයෙන් සිය දරු දෙදෙනා අහිමිවූ පියෙකු ගොනු කළ පෙත්සම සහ සංචාරක කර්මාන්තයේ නිරත ව්‍යාපාරිකයකු විසින් ගොනු කළ පෙත්සම සලකා බැලීම ලබන 31 වැනිදා කල් තැබීමට ශ්‍රේෂ්ඨාධිකරණය අද ( 21) තීන්දු කළේය.

ප්‍රහාරයෙන් දරු දෙදෙනා අහිමි වු පියෙකු ගොනු කළ පෙත්සම අද දින මෙම පෙත්සම කැඳවු අවස්ථාවේදී  අදාළව  වගඋත්තරකාර හිටපු ආරක්ෂක ලේකම්වරයා සහ පොලිස්පති වෙනුවෙන් ජනාධිපති නීතීඥ අනුජ ප්‍රේමරත්න සහ ජනාධිපති නීතීඥ කිෂ්මාල් වර්ණසූරිය යන මහත්වරුන් පෞද්ගලිකව පෙනී සිටියේය.

මෙම පෙත්සම බුවනෙක අළුවිහාරේ, එල්.ටී.බී දෙහිදෙණිය සහ ප්‍රීති පද්මන් සූරසේන යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැදවිණි.

පෙත්සම කැදවූ අවස්ථාවේදී වගඋත්තරකාර හිටපු ආරක්ෂක ලේකම් වෙනුවෙන් පෙනී සිටි ජනාධිපති නීතීඥ අනුජ ප්‍රේමරත්න මහතා කියා සිටියේ තමන්ට නොතීසි නොලැබුණු බවත් පුවත්පත් හී පළවූ ප්‍රවෘත්තිය දැක තම සේවාදායකයා වෙනුවෙන් පෙනී සිටි බවයි.

එම කරුණු සළකා බැලු ශ්‍රේෂ්ඨාධිකරණය වගඋත්තරකරුවන්ට නොතීසි දන්වා යළි බාර දෙන ලෙසට පෙත්සම්කරුගේ නීතීඥවරයාට දැනුම් දුන්නේය.

ඒ අනුව ලබන 31 වනදා සළකා බැලීමට ශ්‍රේෂ්ඨාධිකරණය අද (21) තීන්දු කළේය.