(තිළිණි ද සිල්වා සහ රංජන් කටුගම්පොළ)
 
වැඩ තහනමකට ලක්ව සිටින ත‍්‍රස්ත විමර්ශන කොට්ඨාසයේ හිටපු අධ්‍යක්ෂක , නියෝජ්‍ය පොලිස්පති නාලක ද සිල්වා මහතාට මාසිකව අර්ධ වැටුපක් ගෙවන ලෙස කරන ඉල්ලීම සම්බන්ධයෙන් කරුණු දැක්වීමට ජාතික පොලිස් කොමිෂන් සභාවේ ලේකම්වරයාට ලබන පෙබරවාරි 17 වැනිදා අධිකරණය හමුවේ පෙනී සිටින්නැයි දන්වමින් ශ්‍රේෂ්ඨාධිකරණය අද (09) නොතීසි නිකුත් කරන ලදී.
 
ප‍්‍රභූ ඝාතන කුමන්ත‍්‍රණ චෝදනා සම්බන්ධයෙන් අත්අඩංගුවට ගෙන ඇප මත මුදාහැර සිටින සිය සේවාදායකයාගේ මූලික ආදායම් මාර්ගය අහිමිවීම නිසා  දැඩි ආර්ථික අපහසුතාවයට පත්ව ඇති බවත් , ඔහුට මාසිකව අර්ධ වැටුපක් ගෙවන්නැයි  වැඩ තහනමට ලක්ව සිටින නියෝජ්‍ය පොලිස්පතිවරයා වෙනුවෙන් පෙනී සිටි ජනාධිපති නීතීඥ සංජීව ජයවර්ධන මහතා කළ ඉල්ලීමක් සලකා බලමින් ශ්‍රේෂ්ඨාධිකරණය මෙම නියෝගය කළේය.
 
ශ්‍රේෂ්ඨාධිකරණය මෙම නියෝගය නිකුත් කරනු ලැබුවේ හිටපු ජනාධිපති මෛත‍්‍රීපාල සිරිසේන මහතා ඇතුළු ප‍්‍රභන් පිරිසක් ඝාතනය කිරීමට කුමන්ත‍්‍රණය කළේ යැයි කියන සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගැනීමට නීතිවිරෝධී බවට නියෝගයක් නිකුත් කරන්නැයි ඉල්ලා නාලක ද සිල්වා මහතා ගොනු කළ මූලික අයිතිවාසිකම් පෙත්සමක් අද (09) සලකා බැලූ අවස්ථාවේදීය.
 
බුවනෙක අළුවිහාරේ , මුර්දු ප‍්‍රනාන්දු සහ එස්.තුරෛයිරාජා යන මහත්ම මහත්මීන්ගෙන් යුතු විනිසුරු මඩුල්ලක් හමුවේ මෙම පෙත්සම සලකා බැලිණි.

පෙත්සමේ වගඋත්තරකරුවන් ලෙස නම් කර තිබූ ආරක්ෂක ලේකම් , පොලිස්පති , අපරාධ පරීක්ෂණ දෙපාර්තමේන්තු අධ්‍යක්ෂක යන තනතුරු දැරූ නිලධාරීන් මේවනවිට වෙනස් වී ඇති බව පෙන්වා දෙමින් පෙත්සම්කාර පාර්ශවය එහිදී අධිකරණයට කළ කරුණු දැක්වීමට නීතිපතිවරයා මෙහිදී විරුද්ධත්වයක් නොදැක්වීය.
 
ඒ අනුව පෙත්සමේ වගඋත්තරකරුවන්ගේ නම් ඇතුළත් ශීර්ෂය සංශෝධනය කිරීමටද විනිසුරු මඩුල්ල එහිදී පෙත්සම්කාර පාර්ශවයට අවසර ලබා දුන්හ.
 
පෙත්සම සලකා බැලීම ලබන පෙබරවාරි 17 වැනිදාට කල් තබන ලදී.
 
වැඩතහනමට ලක්ව සිටින නියෝජ්‍ය පොලිස්පති නාලක ද සිල්වා මහතා ගොනු කළ පෙත්සමේ වගඋත්තරකරුවන් ලෙස ආරක්ෂක ලේකම් , පොලිස්පති , අපරාධ පරීක්ෂණ දෙපාර්තමේන්තුවේ අධ්‍යක්ෂක , නීතිපති ඇතුළු පිරිසක් නම් කරනු ලැබ තිබිණි.
 
හිටපු ජනාධිපති මෛත‍්‍රීපාල සිරිසේන මහතා ඇතුළු ප‍්‍රභන් පිරිසක් ඝාතනය කිරීමට කුමන්ත‍්‍රණය කළේ යැයි කියන සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගත් බවත් , එමඟින් සිය මූලික අයිතිවාසිකම් උල්ලංඝනය වී ඇති බවට ප‍්‍රකාශ කරන ලෙසත් , එම අත්අඩංගුවට ගැනීම නීතිවිරෝධී බවට නියෝගයක් නිකුත් කරන්නැයි ඉල්ලා පෙත්සම්කාර නාලක ද සිල්වා මහතා සිය පෙත්සම මඟින් ඉල්ලා තිබිණි.
 
පෙත්සම්කාර නාලක ද සිල්වා මහතා වෙනුවෙන් ජනාධිපති නීතීඥ සංජීව ජයවර්ධන මහතාද නීතිපති වෙනුවෙන් අතිරේක සොලිස්ටර් ජනරාල් විරාජ් දයාරත්න හා නියෝජ්‍ය සොලිසිටර් ජනරාල් දිලීප පීරිස් යන මහත්වරු පෙනී සිටියහ.