( තිළිණි ද සිල්වා )

පුද්ගල ජාවාරම් චෝදනා මත ඉතාලියේ මිලාන් නුවර ගුවන්තොටුපළකදී  අත්අඩංගුවට පත් ලාංකිකයා රාජ්‍යතාන්ත‍්‍රික නිලධාරියෙකු නොවන බවට තහවුරු වී ඇතැයි විදේශ කටයුතු අමාත්‍යාංශය සඳහන් කර සිටී.
 
පුද්ගලයින් සිව් දෙනකු නීති විරෝධීව ඉතාලියට රැගෙන ඒමට උත්සාහ කළේය යන චෝදනාව මත රාජ්‍ය තාන්ත‍්‍රික විදේශ ගමන් බලපත‍්‍රයක් හිමි ලාංකිකයකු මිලාන් නුවර මල්පෙන්සා ගුවන් තොටුපළේදී අත්අඩංගුවට ගත් බවට පළවූ ඉතාලි මාධ්‍ය  වාර්තා වල  සත්‍ය අසත්‍ය  බව තහවුරු කරගැනීමට අමත්‍යාංශය විසින් සිදු කළ විමර්ශනයේදී මෙම කරුණු තහවුරු වී ඇති බවද එම අමාත්‍යාංශය අද  (18) නිවේදනයක් නිකුත් කරමින් කියා සිටී.
 
සිදු කරනු ලැබූ විමර්ශනයේදී මිලාන් නුවර පිහිටි ශ්‍රී ලංකා කොන්සල් ජනරාල් කාර්යාලයේ නිලධාරීන් අත්අඩංගුවට ගනු ලැබූ සැකකාර ලාංකිකයා මුණගැසී ඇති අතර එහිදී ඔහු රාජ්‍යතාන්ත‍්‍රිකයකු නොවන බව තහවුරු කර ගැනීමට හැකිවී ඇත.
 
අත්අඩංගුවට පත් මෙම පුද්ගලයා වර්තමානයේදී කිසිදු ශ්‍රී ලංකා විදේශ දූත මණ්ඩලයක හෝ විදේශ කටයුතු අමාත්‍යාංශශයේ හෝ සේවය නොකරන බවත් ,  අදාළ පුද්ගලයා සතුව වලංගු රාජ්‍යතාන්ත‍්‍රික විදේශ ගමන් බලපත‍්‍රයක්ද නොමැති බව විදේශ කටයුතු අමාත්‍යාංශය කියා සිටී.
 
මොහු සම්බන්ධයෙන් සෙයා බැලීමට සිදු කළ විමර්ශනයේදී අදාළ පුද්ගලයා ශ්‍රී ලංකාවේ රජයේ ආයතනයක සේවයේ නියුතු වීම පදනම් කරගෙන ඔහු වෙත නිකුත් කර ඇති නිල විදේශ ගමන් බලපත්රියක් මඟින් මෙම පුද්ගලයා ඉතාලිය බලා පිටත්ව ගොස් ඇති අයෙකු බවද හෙලී වී ඇතැයි අමාත්‍යාංශය විසින් නිකුත් කළ නිවේදනයේ සඳහන් වේ.
 
මෙම පුද්ගලයා කොන්ත‍්‍රාත් පදනම මත 2012-2015 යන කාලය තුළ විදේශ රටක රාජ්‍ය තාන්ත‍්‍රික තනතුරක් දරා ඇති අයෙකුවන අතරම ,  කොන්ත‍්‍රාත් කාලය අවසානයේදී අවලංගු කරන ලද රාජ්‍ය තාන්ත‍්‍රික විදේශ ගමන් බලපත‍්‍රයක් මොහු සතුව තිබී ඇති බවද තහවුරු කර ගැනීමට හැකි වී ඇතැයි එම නිවේදනයේ වැඩිදුරටත් සමඳහන් වේ.
 
නීතිවිරෝධී ලෙස තරුණයන් සිවුදෙනකුට ඉතාලියට පැමිණීමට උත්සාහ කළ ශ්‍රී ලාංකික රාජ්‍ය තාන්ති‍්‍රක නිලධාරියකු බව පැවසෙන අයකු අත්අඩංගුවට ඉතාලි ගුවන් තොටුපොළ පොලිසියේ අත්අඩංගුවට පත්ව ඇති බවට ඉතාලි වරීස් ප්‍රෙස් ඇතුළු මාධ්‍යය කිහිපයක්ම වාර්තා කර තිබිණි.