ඉන්දියාවෙන් දිනක් ඇතුළත වාර්තා වූ වැඩිම කොරෝනා ආසාදිතයන් ගණන අද (1) වාර්තා වූ අතර එම ගණන 8,392ක් ලෙස දැක්විණි.

අඛණ්ඩව දෙවැනි දිනටත් පැය 24ක් ඇතුළත ඉන්දියාවෙන් වාර්තා වූ කොරෝනා ආසාදිතයන්ගේ ගණන අද අටදහස ඉක්මවා ගියේය. අඛණ්ඩව දින 12ක් තිස්සේ ඉන්දියාවෙන් දෛනික වාර්තා වූ ආසාදිතයන්ගේ ගණන හයදහස ඉක්මවූ අතර එරටින් අද පස්වරු 5.00 වනවිට වාර්තා වූ සමස්ත කොරෝනා ආසාදිතයන්ගේ ගණන 1,90,535ක් දක්වා ඉහළ ගියේය. ඉන්දියාවෙන් මැයි මස (21) වැනිදා සිට දෛනිකව වාර්තා වූ කොරෝනා ආසාදිතයන්ගේ ගණන 6,000 ඉක්මවීය.

ඉන්දියාවෙන් අවසන් පැය 24ක කාලයේදී කොරෝනා ආසාදිත මරණ 230ක් වාර්තා වූ අතර ඒ අනුව එරටින් අද (1) පස්වරු 5.00 වනවිට වාර්තා වූ කොරෝනා ආසාදිත සමස්ත මරණ ගණන 5,394ක් ලෙස දැක්විණි. ඉන්දියාවෙන් වාර්තා වන කොරෝනා ආසාදිත මරණ ගණන කොරෝනා වයිරසය ව්‍යාප්ත වීම ආරම්භ වූ චීනයෙන් වාර්තා වන කොරෝනා ආසාදිත මරණ ගණන ද ඉක්මවා ගොස් ඇත.

ඉන්දියාවේ කොරෝනා වයිරසය ආසාදනය වී සුවය ලබා රෝහල්වලින් පිට වී ගිය සංඛ්‍යාව 91,819ක් විය. කොරෝනා වයිරසය ආසාදනය වී ඉන්දියාවේ විවිධ රෝහල්වල ප්‍රතිකාර ලබන ගණන 93,322කි.

කොරෝනා ආසාදිතයන්ගේ පනස් දහස ඉක්මවූ එකම ප්‍රාන්තය බවට මහාරාෂ්ට්‍ර ප්‍රාන්තය පත්ව ඇති අතර එම ප්‍රාන්තයෙන් අද (1) පස්වරු 5.00 වනවිට වාර්තා වූ ආසාදිතයන්ගේ ගණන 67,655 ක් විය. දෙවැනියට වැඩිම ආසාදිතයන් ගණනක් වාර්තා වන්නේ තමිල්නාඩු ප්‍රාන්තයෙනි. තමිල්නාඩු ප්‍රාන්තයෙන් අද පස්වරු වනවිට වාර්තා වූ ආසාදිතයන්ගේ ගණන 22,333කි. ඉන්දියාවේ මූල්‍ය අගනගරය හෙවත් මූල්‍ය කේන්ද්‍රස්ථානය වන මුම්බායි නුවර පිහිටා ඇත්තේ මහාරාෂ්ට්‍ර ප්‍රාන්තයේ ය.

ඉන්දීය අග්‍රාමාත්‍ය නරේන්ද්‍ර මෝදිගේ ප්‍රාන්තය වන ගුජරාට් ප්‍රාන්තයෙන් අද පස්වරු වනවිට වාර්තා වූ ආසාදිතයන්ගේ ගණන 16,779ක් වූ අතර දිල්ලියෙන් වාර්තා වූ ආසාදිතයන්ගේ ගණන 19,844ක් ලෙස දැක්විණි.

එන්.ඩී.ටීවී.

055