(විනීතා එම් ගමගේ)

බස්නාහිර පළාතට ජංගම උසාවි කිහිපයක් ලබා දෙන ලෙස තමන් අධිකරණ හා බන්ධනාගාර ප‍්‍රතිසංස්කරණ ඇමතිනි තලතා අතුකෝරළ මහත්මිය ගෙන් ඉල්ලා සිටීමට බලාපොරොත්තු වන බව බස්නාහිර පළාත් ආණ්ඩුකාර අසාද් සාලි මහතා ප‍්‍රකාශ කළේය.

විශේෂයෙන් කොළඹ නගරයට එවැනි ජංගම උසාවියක අවශ්‍යතාව පවතින්නේ යැයි ද හෙතෙම කියා සිටියේය.

වාහනයක පවත්වාගෙන යන උසාවියක් මඟින් ස්ථානිය දඩ අයකිරීම් සිදු කිරීම තුළින් මාර්ග නීති උල්ලංඝණය අවම වනු ඇතැයි කී අසාත් සාලි මහතා රථවාහන සඳහා පමණක් නොව පදිකයන් කරන නීති  කැඞීම් සඳහා ද එවැනි උසාවියකින් දඩ නියම කළ හැකි වෙතැයි සඳහන් කළේය.

හරකුන් බල්ලන් පවා සුදු ඉරෙන් පාර මාරු වෙද්දී මිනිසුන් හිතුණු හිතුණු  තැන්වලින්  පාර පනින බව තම නිරීක්ෂණය යැයි ද එවැන්නන්ට දඩයක් ගසා හෝ නිසි මඟට ගැනීමට කටයුතු කළ යුතු බව ද කී අසාද් සාලි මහතා මෙම කටයුතු වලදී තමන්ට කිසිදු දේශපාලනයක් නැතැයි ද පැවැසීය.

බස්නාහිර පළාත් ආණඩුකාරවරයා මේ අදහස් පළ කළේ පළාත් ආණ්ඩුකාර කාර්යාලයේ  පැවැති මාධ්‍ය හමුවක් අමතමිනි.

කොළඹ නගරාධිපතිනි රෝසි සේනානායක මහත්මිය හා ආණ්ඩුකාරවරයා අතර පැවැති සාකච්ඡාවකින් පසු මාධ්‍යයට අදහස් දක්වමින් ඔහු මේ අදහස් පළ කළේය.

පුරපතිනිය තමන් හමුවීමට අවශ්‍ය බව කිහිප වතාවක් දැනුම් දී තිබු බවත් ඒ සඳහා අවස්ථාව ලැබුණේ අද බවත් කී සාලි මහතා නගර සභාවේ පුරප්පාඩු ගැන, නගරයේ පිරිසිදු කම පිළිබඳව මෙන්ම එහි ඇති බොහෝ ගැටලූ ගැන එහි දී සාකච්ඡා කළ බව ද පැවැසීය.

වාණිජ නගරයක් වූ  කොළඹ නගරයේ පදික වේදිකා වෙළඳාම නිසා පාරවල් ඇහිරී ඇති බවත්  ඕවල් හා කෙත්තාරාමය පවා අද ඒ තත්ත්වයට වැටී ඇති බවත් හෙතෙම සඳහන් කළේය.  

කොළඹ නගරය ලස්සනට පවත්වා ගෙන යායුතු බව තමන් 1998 සිට කියන දෙයක් යැයි කී ආණ්ඩුකාරවරයා නියෝජ්‍ය නගරාධිපති ලෙස කලක් කටයුතු කළ තමන්ට ඒ සඳහා අත්දැකීම් රැසක් ඇතැයි ද පැවැසීය.