( තිළිණි ද සිල්වා සහ රංජන් කටුගම්පොළ )

ජනතා විමුක්ති පෙරමුණේ පෞද්ගලික මන්ත‍්‍රී යෝජනාවක් ලෙසින් ඉදිරිපත් කර ඇති 20 වැනි ආණ්ඩුක‍්‍රම ව්‍යවස්ථා සංශෝධන පනත් කෙටුම්පත නීතීයට පටහැනි යැයි ප‍්‍රකාශ කරන මෙන් ඉල්ලා පාර්ලිමේන්තු මන්ත‍්‍රී උදය ගම්මන්පිල මහතා ගොනු කළ විශේෂ පෙත්සම වැඩිදුර විභාගය හෙටට (13) කල් තැබීමට ශ්‍රේෂ්ඨාධිකරණය අද (12 ) තීන්දු කළේය.

සිසිර ද ආබෲ, ප‍්‍රසන්න ජයවර්ධන සහ මුර්දු ප‍්‍රනාන්දු යන මහත්ම මහත්මීන් ගෙන් යුතු ත‍්‍රීපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ පෙත්සම සලකා බැලිණි.

එම පෙත්සමේ වගඋත්තරකරු ලෙස නීතිපතිවරයා නම් කරනු ලැබ ඇත.

එහිදී පාර්ලිමේන්තු මන්ත‍්‍රී උදය ගම්මන්පිල මහතා වෙනුවෙන් ජනාධිපති නීතිඥ මනෝහර ද සිල්වා මහතා කරුණු ඉදිරිපත් කිරීම් සිදු කළේය.

එහිදී ජනාධිපති නීතිඥවරයා සඳහන් කර සිටියේ යෝජිත පෞද්ගලික මන්ත‍්‍රී යෝජනාව මඟින් වත්මන් ව්‍යවස්ථාව යටතේ පවතින විධායක ජනාධිපති ධුරය අහෝසි කිරීමට යෝජනා කර තිබෙන බවයි.
ඒ හරහා විධායක බලය ජනාධිපතිවරයා සහ අග‍්‍රාමාත්‍යවරයා ප‍්‍රමුඛ අමාත්‍ය මණ්ඩලය වෙත බෙදී යාමේ අවදානමක් පවතින බව සඳහන් කළ ජනාධිපති නීතිඥවරයා සඳහන් කළේය.

මෙම සංශෝධනය මඟින් පළාත් ආණ්ඩුකාරවරුන්ගේ බලතල අඩු කොට පළාත් ප‍්‍රධාන අමාත්‍ය වරුන්ගේ බලය ඉස්මතු වීමක් සිදුවූ බවත් මේ හරහා බලය බෙදී ගොස් රට ෆෙඩරල් පාලනය කරා යොමු වීමේ අවදානමක් මතුව තිබෙන බව දැන් ජනාධිපති නීතිඥවරයා මෙහිදී පෙන්වා දුන්නේය.
වැඩිදුර පෙත්සම් විභාගය අද (12) දිනට කල් තැබුණි.

මෙම  විභාගය සඳහා මැදිහත් වී කරුණු දැක්වීමට අවසර දෙන මෙන් ජනතා විමුක්ති පෙරමුණ විසින් ඉල්ලීමක් කළ අතර එම ඉල්ලීමට අධිකරණය අවසර ලබා දුන්නේය.

ඒකාබද්ධ විපක්ෂයේ පාර්ලිමේන්තු මන්ත‍්‍රී උදය ගම්මන්පිල, රාවණා බලය සංවිධානයේ කැඳවුම්කරු පූජ්‍ය ඉත්තෑකන්දේ සද්ධාතිස්ස හිමියන්, ආචාර්ය ගුණදාස අමරසේකර නීතිඥ පාලිත සේනාධීර ඇතුළු පිරිසක් විසින් අදාළ මන්ත‍්‍රී යෝජනා වලට එරෙහිව ශ්‍රේෂ්ඨාධිකරණය වෙත පෙත්සම් ඉදිරිපත් කර තිබුණි.

මෙම පෙත්සම් වලින්  පෙන්වා දෙන්නේ ආණ්ඩුක‍්‍රම ව්‍යවස්ථාවේ 20 වන සංශෝධනය යනුවෙන් සඳහන් කරමින් ඉකුත් බදදා (05) ජනතා විමුක්ති පෙරමුණ විසින් යෝජනාවක් පාර්ලිමේන්තුවට ඉදිරිපත් කළ බවය.

එම පෞද්ගලික මන්ත‍්‍රී යෝජනාව මඟින් විධායක ජනාධිපති ධූරය අහෝසි කිරීම ඇතුළු කාරණා කිහිපයක් ඇතුළත් කර ඇති බව සඳහන් කරන  ගම්මන්පිල මන්ත‍්‍රීවරයා ඉන් ආණ්ඩුක‍්‍රම ව්‍යවස්ථාවේ තුන්වන හා හතරවන වගන්ති සෘජුවම උල්ලංඝනය කරන බව පෙන්වා දේ.

මේ හේතුවෙන් අදාළ යෝජනාව පාර්ලිමේන්තුවේ සාමාන්‍ය ඡන්දයකින් සම්මත කළ නොහැකි බවද පෙත්සම්කරුවෝ පෙන්වා දෙයි.

මෙම යෝජනාව තුළින් සෘජුවම ආණ්ඩුක‍්‍රම ව්‍යවස්ථාව උල්ලංඝනය වීමක් සිදුවන හෙයින් එය පාර්ලිමේන්තුවේ තුනෙන් දෙකක බහුතර ඡුන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන මෙන් ද පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබේ.