( විනීතා එම් ගමගේ )

අතීතය ගැන සොයා බලන ආකාරයෙන් වර්තමානය ගැනත් සොයා බලන්නැයි තමන් ආණ්ඩුවෙන් ඉල්ලා සිටින බවත් එය හැට දෙලක්ෂයක ජනතාවගේ බලාපොරොත්තුව බවත් වමේ කේන්ද්‍රයේ සම කැඳවුම්කරු චමීර පෙරේරා මහතා ප‍්‍රකාශ කරයි.

වර්තමානයේ සිදුව ඇති මහ බැංකු සිද්ධිය යහපාලනයට බරපතල කැළලක් බැවින් ඒ ගැන ද විශේෂයෙන් සෙවිය යුතු යැයි ද හෙතෙම පවසයි.

ඒ මහතා මේ බව පැවසූවේ සමාජ හා සාමයික කේන්ද්‍රයේ අද (21) පැවැති මාධ්‍ය හමුවක් අමතමිනි.  

‘‘මහ බැංකු ප‍්‍රශ්නයේ දී හිටපු අධිපති කියල තිබුණා තමන් විදේශිකයෙක් නිසා කොමිසම ඉදිරියේ සාක්ෂි දෙන්න වුවමනා නැහැ කියලා. නමුත් ඔහු දේශිය ද විදේශිය ද කියල අදාල නැහැ, ඔහු මහ බැංකු අධිපතිවරයා ලෙස සාක්ෂි දෙන්න අවශ්‍යයි.

එහි සිදුවන විමර්ශනවලට සහය දෙන්න ඔහු බැඳී සිටිනවා. රාජිත සේනාරත්න අමාත්‍යවරයා වරක් කිව්වා මම මොහු මහ බැංකු අධිපති කරනවාට මම විරුද්ධ වුණා. ඒ වෙලාවේ රනිල් වික‍්‍රමසිංහ මහතා කිව්වා මම පුද්ගලිකව මොහුට වග කියනවා කියලා. එහෙම නම් දැන් රනිල් මහතා වගකිව යුතුයි. මේ සිද්ධිය යහපාලනයට බරපතල කැළලක්.

අපරාධ කළ අයට දඬුවම් දිය යුතුය යන මතය ඉදිරිපත් කළ සරත් ෆොන්සේකා මහතාට එරෙහිව විවිධ නම්වලින් පෙනී සිටින සංවිධානවලට අයත් 50 ක් 60 ක් පාර්ලිමේන්තුව ලඟට ඇවිත් කෑ ගහල තිබුණා. නමුත් මේ යුද අපරාධවලට හවුල් වුණ අයගෙන් යුද හමුදාවට සිදුවූ අපකීර්තිය විශාලයි.

ඒ තත්ත්වය ඇති කළේ මහින්ද රාජපක්ෂ හා ගෝඨාභය රාජපක්ෂයි. ඒ ගැන රජය වහාම කටයුතු කළ යුතුයි. ඒ නිසාම අතුරුදන්වූවන් පිළිබඳ කාර්යංශය පිහිටුවිය යුතුයි. මහින්දලාගේ සට්ටඹියන් පනහක් හැටක් පාරට බැස්සට ඒක නවත්වන්න එපා කියා අපි ආණ්ඩුවෙන් ඉල්ලා සිටිනවා. රජයේ වගකීම හැට දෙලක්ෂයක් වූ ජනතාවගේ බලාපොරොත්තු හා ඔවුන්ට යුක්තිය ඉටු කිරීමයි.“යැයි ඒ මහතා ප්‍රකාශ කරයි