විනීතා එම් ගමගේ
 
සයිටම් වෛද්‍ය සිසුන්ට කොතලාවල ආරක්ෂක විශ්ව විද්‍යාලයේ ලබා දෙන වෛද්‍ය උපාධියට සයිටම් නම ද එක් කිරීමට එරෙහිව නඩු පවරන බව සයිටම් වෛද්‍ය ශිෂ්‍ය දෙමාපිය සංසදය පවසයි.
 
ඒ සඳහා කටයුතු කරමින් සිටින බවත් මේ සතිය ඇතුළත අධිකරණය ඉදිරියට යා හැකි වනු ඇති බවත් එම සංසදය කියයි. 
 
මේ වනවිටත් ශ්‍රී ලංකා වෛද්‍ය සභාව මඟින් සයිටම් වෛද්‍ය උපාධිය අසාධු ලේඛන ගත කර ඇති බැවින් සයිටම් නම යෙදීම  නිසා තම දරුවන්ගේ වෛද්‍ය උපාධිය ලෝකයේ කිසිදු පිළිගැනීමක් නැති වෛද්‍ය උපාධියක් බවට පත්වන නිසා මෙසේ අධිකරණය ඉදිරියට යෑමට තීරණය කළ බව සයිටම් වෛද්‍ය ශිෂ්‍ය දෙමාපිය සංසදයේ සභාපති ගැමුණු විජේරත්න මහතා ප්‍රකාශ කළේය.
 
සයිටම් අහෝසි කළ ක්‍රමය හෝ එහි කැබිනට්  පත්‍රිකාවට  තමන්ගේ කිසිදු විරෝධයක් නොමැති  බවත් ප්‍රශ්නය ඇත්තේ උපාධියේ නමට සයිටම් යන වචනය ආදේශ කර තිබීම පමණක් බවත් හෙතෙම සඳහන් කළේය. 
 
සයිටම් සිසුන් බඳවා ගැනීම සඳහා කොතලාවල ආරක්ෂක විශ්ව විද්‍යලයේ පනත  පවා සංශෝධනය කරමින් පවතින අවස්ථාවක මෙසේ උපාධියේ නම නිසා මේ සිසුන්ගේ ජීවිත අයාලේ යන්නට දීම රජයක වගකීම දැයි විමසූ විජේරත්න මහතා ඉක්මණින්ම මෙම වරද නිවැරදි කරන්නට ජනාධිපතිවරයා ඇතුළු රජය පියවර ගනු ඇතැයි  බලාපොරොත්තු වන බව ද ප්‍රකාශ කළේය. 
 
විජේරත්න මහතා මේ අදහස් පළ කළේ මරදාන සමාජ හා සාමයික කේන්ද්‍රයේ අද  පැවැති මාධ්‍ය හමුවක අදහස් දක්වමිනි.