(හර්ෂණ තුෂාර සිල්වා)

ජනාධිපති මෛත්‍රිපාල සිරිසේන මහතාගේ ඉල්ලීම අනුව කටයුතු කිරීම හේතුවෙන් පාර්ලිමේන්තුවේ කටයුතු සාමකාමීව කරගෙන යෑමට හැකි වූ බව කැබිනට් ප්‍රකාශක අමාත්‍ය මහින්ද සමරසිංහ මහතා අද (19) පැවැසීය.

ස්ථාවරවල නියෝගවලට අනුව, නීත්‍යනුකූලව හා සාමකාමීව කටයුතු කරන්නැයි ජනාධිපති මෛත්‍රිපාල සිරිසේන මහතා සර්ව පාක්ෂික සමුළුවේදී සියලු පක්ෂ නායකයන්ගෙන් හා පක්ෂ සාමාජිකයන්ගෙන් ඉල්ලා සිටි බවත් සියලු දෙනා එම ඉල්ලීම පිළිගනිමින් ඊට අනුව කටයුතු කළ බවත් සමරසිංහ මහතා කීය.

කොළඹ ප්‍රවෘත්ති දෙපාර්තමේන්තුවේ පැවැති මාධ්‍ය හමුවකදී අදහස් දක්වමින් එම කරුණු සඳහන් කළේය.

ස්ථාවර නියෝග අනුව කටයුතු කරමින් නමින් ඡන්දයක් කැඳවා එහි ප්‍රතිඵල තමන්ට එවන්නැයි ද ජනාධිපතිවරයා ප්‍රකාශ කළ බව අමාත්‍යවරයා කීවේය.

යෝජනා සම්මත වන ආකාරය සම්බන්ධයෙන් පැහැදිලි හා විනිවිදභාවයක් තිබිය යුතු බවත් සාමකාමී අයුරින් යෝජනා සම්මත විය යුතු බවත් ජනාධිපතිවරයා සර්ව පාක්ෂික සමුළුවේදී දැනුම් දුන් බව ද හෙතෙම කීවේය. එසේම එවන යෝජනාව විශ්වාස කළ හැකි විය යුතු බව ද ජනාධිපතිවරයා දැනුම් දුන් බවත් සමරසිංහ මහතා පැවැසීය.

ක්‍රියාවට නැංවිය හැක්කේ එසේ එවන යෝජනාවක් යැයි ජනාධිපතිවරයා පක්ෂ නායකයන්ට දැනුම් දුන් බව ද අමාත්‍යවරයා කීය.  

කතානායකවරයා සර්ව පාක්ෂික සමුළුව වර්ජනය නොකළ බව කී අමාත්‍ය මහින්ද සමරසිංහ මහතා ඔහු ඊට සහභාගි නොවූයේ ඔහු පක්ෂයකට අයත් නොවන නිසා බවත් කීය.

ජනාධිපතිවරයා සහ කතානායකවරයා සර්ව පාක්ෂික හමුවට පෙර දුරකතනයෙන් කරුණු සාකච්ඡා කළ බව ද අමාත්‍ය සමරසිංහ මහතා කීවේය. 

 

 (ඡායාරූපය - ගයාන් අමරසේකර)