(ඩයනා උදයංගනී)
         
අතුරුදන් වූ තැනැත්තන් පිළිබඳ කාර්යාලය විසින් ඉදිරිපත් කරන ලද නිර්දේශ අධ්‍යයනය කර සුදුසු ඉදිරි ක‍්‍රියාත්මක යෝජනා කිරීම සඳහා අමාත්‍ය මණ්ඩල අනුකාරක සභාවක් පත්කිරීමට අමාත්‍ය මණ්ඩලය තීරණය කර ඇත.   

අමාත්‍යවරුන් 10 දෙනෙකුගෙන් යුත් මෙම අමාත්‍ය මණ්ඩල අනුකාරක සභාවේ සභාපතිවරයා වන්නේ උසස් අධ්‍යාපන හා සංස්කෘතික කටයුතු අමාත්‍ය ආචාර්ය විජයදාස රාජපක්‍ෂ මහතාය.

ජනාධිපති මෛත‍්‍රීපාල සිරිසේන මහතා විසින් අමාත්‍ය මණ්ඩලයට ඉදිරිපත් කළ යෝජනාවක් අනුව මෙම පියවර ගෙන ඇති අතර එම අනුකාරක සභාවේ යෝජනා ක‍්‍රියාත්මක කිරීම පිණිස අවශ්‍ය පහසුකම් සලසා ගැනීම සඳහා ජනාධිපතිවරයා ඉදිරිපත් කළ යෝජනාවට ද අනුමැතිය හිමිවී තිබේ.

අතුරුදන් වූ තැනැත්තන් පිළිබඳ කාර්යාලය මගින් පසුගිය මාසයේ ඉදිරිපත් කරන ලද අතුරු වාර්තාව මගින් හානි පූරණය සඳහා වන නෛතික වගකීම සඳහා ගත යුතු පියවරත්, එවැනි සිදුවීම් යළි සිදුනොවීමට වගබලා ගැනීම සඳහා වන නෛතික ප‍්‍රතිසංස්කරණ සම්බන්ධයෙන් සිය නිර්දේශත් ඉදිරිපත් කරනු ලැබ ඇති බව සම කැබිනට් ප‍්‍රකාශක ඉඩම් හා පාර්ලිමේන්තු කටයුතු අමාත්‍ය ගයන්ත කරුණාතිලක මහතා පැවසීය.

අමාත්‍ය ගයන්ත කරුණාතිලක මහතා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (19) පැවති කැබිනට් තීරණ දැනුම්දීමේ මාධ්‍ය හමුව අමතමිනි.