(බිඟුන් මේනක ගමගේ)

ජාතික ළමා ආරක්ෂක අධිකාරියේ ප්‍රාදේශීය ළමා ආරක්ෂක නිලධාරි තනතුරට විධිමත් සම්මුඛ පරීක්ෂණයක් මගින් තෝරාගත් සුදුසුකම්ලාභීන් 116 දෙනාටම පත්වීම් ලබාදීමට ජාතික ළමා ආරක්ෂක අධිකාරියේ අධ්‍යක්ෂ මණ්ඩල තීරණයක් ගෙන තිබියදී ළමා හා කාන්තා කටයුතු ඇමැතිනි චන්ද්‍රාණි බණ්ඩාර මහත්මිය හිතාමතාම එම කටයුත්ත කල් දමන්නට කටයුතු කරමින් සිටින බවට අමාත්‍යංශයේ විශ්වාස කටයුතු ආරංචි මාර්ග පවසයි.

ප්‍රාදේශීය ළමා ආරක්ෂක තනතුර සඳහා පසුගිය වසරේ මැයි 28 වැනිදා පුවත්පත් දැන්වීමක් මගින් අයැදුම්පත් කැඳවා ඔක්තෝම්බර් 12 වැනිදා සම්මුඛ පරීක්ෂණ පැවැත්වූ අතර එයින් ඉහළම ලුකුණු ලබාගත් 116 දෙනා මෙසේ පත්වීම් ප්‍රදානයට සුදුස්සන් හැටියට අධිකාරිය විසින් තෝරා ගනු ලැබූහ.

සුදුස්සන් හැටියට තෝරා ගත් බව පසුගිය දෙසැම්බර් 12 වැනිදා ඔවුන්ට දැන් වූ නමුත් එතැන් පටන් විවිධ හේතු දක්වමින් එම පත්වීම් ප්‍රදානය මාස අටකට අධික කාලයක් තිස්සේ පමා කරන්නට ජාතික ළමා ආරක්ෂක අධිකාරිය කටයුතු කළේය. 

හැට හය දෙනෙකුගේ නම් සහිත දේශපාලන ලැයිස්තුවකට පත්වීම් දෙන්නට යාම ඊට ප්‍රධාන හේතුව වූ අතර ලංකාදීප පුවත්පත අවස්ථා ගණනාවකදීම ඊට අදාළ කරුණු හෙළිදරව් කිරීමට කටයුතු කළේය.

මේ අතර සුදුසුකම්ලාභීන් විසින් කාන්තා හා ස්ත්‍රී පුරුෂ සමාජභාවය පිළිබඳ ආංශික අධීක්ෂණ කාරක සභාවට, පරිපාලන කටයුතු පිළිබඳ පාර්ලිමේන්තු කොමසාරිස්වරයා හෙවත් ඔම්බුඞ්ස්මන්වරයාට, ජනාධිපතිවරයාට හා අගමැතිවරයාට ද මේ ගැන පැමිණිලි කරනු ලැබිණි.

කාන්තා හා ස්ත්‍රී පුරුෂ සමාජභාවය පිළිබඳ ආංශික අධීක්ෂණ කාරක සභාව හා  පරිපාලන කටයුතු පිළිබඳ පාර්ලිමේන්තු කොමසාරිස්වරයා විසින් මේ ගැන විමර්ශන දෙකක් ආරම්භ කරනු ලැබුවේ එම පැමිණිලි සැලකිල්ලට ගනිමිනි.

විමර්ශන ආරම්භ කිරීමත් සමග පත්වීම් ප්‍රදානයට ජාතික ළමා ආරක්ෂක අධිකාරිය තීරණය කළ අතර එහි සභාපති නීතිඥ එච්.එම් අබේරත්න මහතා පැවැසුවේ මෙම පත්වීම් සම්බන්ධයෙන් විවිධ පාර්ශ්වවලින් කෙරුණු පැමිණිලි හා විමර්ශනවලට අදාළව කටයුතු කර අධිකාරිය මෙම තීරණය ගත් බවයි.

එහෙත් මේ වනවිට එම පත්වීම් නැවතත් පමා කිරීමට ළමා ආරක්ෂක අධිකාරිය කටයුතු කරමින් සිටින බවත් ඒ ගැන තමන් කරන විමසීමකට ප්‍රතිචාරයක් දැක්වීමටවත් කාරුණික නොවන බවත් පත්වීම් අපේක්ෂිත උපාධිධාරිහු රැසක්ම ලංකාදීපයට පැවසූහ.
 

   මේ සම්බන්ධයෙන් විෂය භාර ඇමැතිවරියගෙන් කරුණු විමසුව ද ඇය අත්‍යවශ්‍ය සාකච්ඡාවක බැවින් ප්‍රතිචාර දැක්විය නොහැකි යැයි ද ඇයගේ සම්බන්ධීකරණ ලේකම් රංජිත් කුලසිංහ මහතාගෙන් ඒ ගැන විමසන්නැයි ද ඇමැතිවරියගේ ආරක්ෂකයෙක් පැවසීය.

ඒ අනුව කළ විමසීමේදී ඇමැතිවරියගේ සම්බන්ධීකරණ ලේකම් රංජිත් කුලසිංහ මහතා පැවසුවේ ඔක්තෝම්බර් 1 වැනිදා අදාළ පත්වීම් ප්‍රදානය කිරීමට කටයුතු සම්පාදනය කළ ද ලෝක ළමා දින සැමරුම එදිනට යෙදී ඇති බැවින් පත්වීම් ප්‍රදානය කල්දැමීමට සිදු වූ බවයි.